“Artist” teleloyihasidagi ishtiroki bilan tomoshabinlar e’tiboriga tushgan yosh xonanda Elyor Meliboyev ilk yakkaxon konsert dasturini o‘tkazdi. Yakkaxon ijodini boshlaganiga ko‘p vaqt bo‘lmagan ijodkorning “Xalqlar do‘stligi” san’at saroyida konsert berishi ko‘pchilik uchun kutilmagan yangilik bo‘lgandi. “Konsert berishga hali erta”, “Uning birorta mualliflik qo‘shiqlari yo‘q” kabi e’tirozlar ham qulog‘imizga chalingandi. Xonandaning taklifiga ko‘ra, “Daryo” muxbirlari konsertga borib, ustoz san’atkorlar va muxlislarning Elyor Meliboyev ijodi haqidagi fikrlarini o‘rgandi.
— Elyorbekning konsertiga haydovchi sifatida kelganman. 13 yoshli o‘g‘lim uning ashaddiy muxlisi, konsert haqidagi xabarlar tarqalganda chipta olib bering, deb iltimos qilgandi. 22 yoshda katta saroyda konsert berish oson emas. Qoyil qolganim: muxlislari ko‘p ekan, zal tomoshabinlar bilan to‘ldi. Umid qilamanki, konsert ham a’lo darajada o‘tadi, — deydi so‘z ustasi Zokir Ochildiyev.
Aytish joizki, ko‘p xonandalar jonli ijroda konsert berishdan qo‘rqadi. Elyor Meliboyev esa jonli ijroda kuylashdan qo‘rqqani yo‘q.
Konsertda xonandaning kover qo‘shiqlaridan tashqari, mualliflik taronalari ham jarang sochdi. “To‘xta urush” qo‘shig‘ini hech bir tomoshabin ko‘z yoshlarsiz tinglagani yo‘q.
Xonanda bolalikda katta saroyda konsert bersa old o‘rindiqda buvisi o‘tirishini orzu qilgani va judolik sabab u insondan erta ayrilganini eslab ko‘ziga yosh oldi.
— Buvimning o‘rni bo‘lakcha edi, shu bois u insonning o‘rniga hech kimni o‘tkazmasliklarini so‘radim, — deb ko‘ziga yosh oldi xonanda.
— Birinchi qadamda kam-ko‘stlar bo‘lishi tabiiy hol. Eng muhimi, o‘sha kamchiliklardan vaqtida to‘g‘ri xulosa chiqarish kerak. Men uchun qadrli bo‘lgan ijodkor Otabek Muhammadzohidga konsertimiz borasida “Kamchiliklarimiz bor”, deganimda “Tugamasin, chunki kamchiliksiz ijodkor eng yuqori cho‘qqiga ko‘tarilgan bo‘ladi. Eng yuqoriga chiqqandan keyin esa pastga qarab tushadi”, degandi. Elyorbekning nafaqat ijodini, balki insoniyligini ham hurmat qilaman. Qo‘li ko‘ksida, samimiy bola, — deydi “Dizayn” jamoasi a’zosi Sa’dulla Fathullayev.
— Elyorni san’atga qadam qo‘ymasidan oldin ham tanirdim. Chunki u bilan Farg‘onaning bir shahrida yashaganmiz. Iste’dodli, mehnatkash va samimiy inson. Imkon bo‘lganda, otni qamchilash kerak. Talab bo‘layotgani uchun ham 22 yoshida konsert beryapti. Qancha konsert bersa, men qo‘ldan kelgancha yordam berishga tayyorman, — deydi qiziqchi Elmurod Haqnazarov.
Konsertga shou-biznes olamining ko‘plab vakillari, ustoz san’atkorlar tashrif buyurishdi. Tomoshabinlar orasida Soat Sharipov, Abdulla Qurbonov, Mehriddin Rahmatov, A’lo Rahimova, Lola Ahmedova kabi ustoz san’atkorlarning borligi quvonarli hol.
Xonanda konsertdan bir necha oy avval Instagram tarmog‘ida chellenj o‘tkazgani va uchta g‘olibni saralab, ularni konsert dasturiga taklif etgandi. Chellenjning final bosqichi katta sahnada bo‘lib o‘tdi va g‘olibni muxlislar tanlab berishdi. Unga ko‘ra farg‘onalik Roziyaxon ismli qiz g‘olib bo‘lib, dugonalari bilan birga Dubayga sayohat yo‘llanmasini yutib oldi.
Ko‘tarinki kayfiyatda o‘tgan konsert dasturidan so‘ng xonandaning ham fikrlari bilan qiziqdik.
— Avvaliga juda hayajonlandim, chunki bu saroyda tomoshabin sifatida ham konsert ko‘rmaganman. Shu bois avvaliga biroz hayajonlandim, ammo muxlislar olqishi kuch bag‘ishladi. Qo‘shiq so‘zlarini unutib qo‘yaman deb xavotir olgandim. Ammo hammasi a’lo darajada o‘tdi, — deydi xonanda.
Reportajni quyidagi havola orqali to‘liq tomosha qilishingiz mumkin.
Izoh (0)