Xitoy Davlat kengashi (mamlakatning oliy ijroiya organi) sobiq bosh vaziri Li Ketsyan 68 yoshida vafot etdi, deb xabar bermoqda Xitoy markaziy televideniyesi CCTV.
Xinhua agentligi aniqlik kiritishicha, Li Ketsyan Shanxayda ta’tilda bo‘lgan. 26-oktyabr kuni siyosatchi yurak xurujiga uchragan. Shifokorlar uni saqlab qolishga uringan, biroq ertasi kuni — 27-oktyabr mahalliy vaqt bilan soat 0:10 da u vafot etdi.
Li Ketsyan 2013-yil mart oyida Xitoy Davlat kengashi bosh vaziri etib tayinlangan, 2018-yilda esa ikkinchi besh yillik muddatga hukumat rahbari etib qayta saylangan. 2023-yil mart oyida u o‘z lavozimini tark etdi — uning o‘rniga o‘tgan yilning kuzida u hukmron Kommunistik partiya Siyosiy byurosi Doimiy qo‘mitasiga qo‘shilgan Li Syan keldi.
Li Syan nomzodini Xitoy yetakchisi Si Szinpin ilgari surgan.
BBC yozishicha, iste’foga chiqishidan oldin Li Ketsyan Kommunistik partiyadagi ikkinchi nufuzli shaxs bo‘lgan. Hukumatga boshchilik qilayotgan paytda u ishsizlik, shahar va qishloq aholisining daromadlari farqi, mamlakatning urbanizatsiyasi kabi ijtimoiy-iqtisodiy masalalar kompleksini hal etishni asosiy vazifa deb atagan. Ma’lumoti bo‘yicha iqtisodchi bo‘lgan Li Ketsyan ushbu sohadagi islohotlar uchun mas’ul edi, shuningdek, COVID-19 pandemiyasi bilan bog‘liq qat’iy cheklovlar tufayli iqtisodiyot duch kelayotgan muammolar haqida ogohlantirgan, deb eslaydi CNN.
Bloomberg qayd etishicha, Lining iqtisodiy masalalarni hal qilishdagi roli so‘nggi yillarda pasaygan, bunga Si Szinpin bunday muammolarni o‘zi va maslahatchisi Lyu Xe boshchiligidagi bir qator partiya qo‘mitalari qo‘liga o‘tkazgani sabab bo‘lgan.
Bosh vazir o‘rinbosari (2008 — 2013) sifatida Li Ketsyan iqtisoddan tashqari energetika, qurilish va sog‘liqni saqlash masalalarini ham nazorat qilgan. Siyosatchi 2007-yilda Kommunistik partiya Markaziy qo‘mitasi Siyosiy byurosiga kirishdan oldin Xenan va Lyaonin provinsiyalarida turli rahbarlik lavozimlarida ishlagan.
Izoh (0)