Qashqadaryodagi Maydanak astronomiya observatoriyasi o‘rnida sihatgoh qurilishi haqida xabarlar tarqaldi. O‘zbekiston Fanlar akademiyasi buni rad etdi.
“O‘zbekiston 24” telekanali orqali efirga uzatilgan lavhada Qashqadaryo viloyatining mutasaddilari intervyu berib, unda Fanlar akademiyasi Astronomiya institutiga qarashli Maydanak astronomiya observatoriyasi haqida “ko‘p yillardan buyon faoliyat yuritmayotgan Maydanak observatoriyasi o‘rnida sihatgoh quriladi” deya fikr bildirilgandi.
Holat yuzasidan munosabat bildirgan Fanlar akademiyasi matbuot xizmatining ma’lum qilishicha, Maydanak baland tog‘ida ikkita obyekt joylashgan. Birinchisi — Fanlar akademiyasi Astronomiya institutiga qarashli Maydanak astronomiya observatoriyasi — respublikadagi eng ilg‘or ilmiy texnik inshootlardan biri hisoblanadi. Maydanak observatoriyasi Fanlar akademiyasining faxri bo‘lib, bugungi kunda o‘zining noyob astroiqlimi bilan jahonning eng yetakchi beshta observatoriyalaridan biri hisoblanadi.
Qayd etilishicha, bu joyda olib borilayotgan tadqiqotlar asosida har yili dunyoning eng nufuzli va yuqori impakt faktorga ega bo‘lgan ilmiy nashrlarida 50 dan ortiq maqolalar chop etiladi, shuningdek bir nechta dissertasiyalar yoqlanadi. Astronomiya instituti va unga qarashli Maydanak observatoriyasi 30 dan ziyod xalqaro loyihalarda faol ishtirok etadi. Qisqa qilib aytganda, Maydanak observatoriyasi bugungi kunda o‘zining 80 yillik yubileyini nishonlayotgan O‘zbekiston Respublikasi Fanlar Akademiyasining eng faol noyob obyektlardan biridir.
“Bu noyob obyekt prezidentimizning doimiy nazoratida bo‘lib, Maydanak observatoriyasini rivojlantirish va uning infratuzilmasini yaxshilashga jiddiy eʼtibor berib kelinmoqda. So‘nggi yillarda observatoriyaga olib boriladigan yo‘llarni taʼmirlash va optik tolali internet tarmog‘ini o‘tkazish ishlari shular jumlasidandir”, — deyiladi xabarda.
Ikkinchisi esa, yaqingacha O‘zbekiston respublikasi Mudofaa vazirligiga tegishli bo‘lgan “Maydanak” o‘lchash majmuasi (Izmeritelniy kompleks “Maydanak”) bo‘lib, ushbu obyekt haqiqatdan ham so‘nggi yillarda faoliyat olib bormagan. Ushbu tepalik Maydanak observatoriyasidan 4 kilometr sharqda joylashgan.
“Hozirda aynan shu joyda turistik zona qurilishi mo‘ljallangan”, — deya tushuntirish berdi Fanlar akademiyasi matbuot xizmati.
Shuningdek, mutasaddilardan bu ikki obyektni nomlaridan foydalanishda aniqlikka amal qilishlarini so‘radi.
Qashqadaryo viloyatining Qamashi tumanida “Maydanak” turistik-rekreatsion zonasi tashkil etilishi haqida 2022-yilning fevralida ma’lum qilingandi. Soha mutaxassislari dengiz sathidan 2650 metr yuqorida bo‘lgan “Maydanak” observatoriyasida bo‘lib, Maydanak tog‘larining 7900 gektar archazor hududlarida o‘tov, camping, glamping, eko-uylar, yengil konstruksiyali konteynerlar joylashtirishni muhokama qilgandi.
Izoh (0)