“Midjourney” neyrotarmog‘i biz sevib tomosha qiladigan filmlar baxtli yakun topganda ularning so‘nggi sahnalari qanday ko‘rinishda bo‘lishi mumkinligini namoyish qilib berdi. Ko‘pchilikka yoqib tushgan kadrlar ijtimoiy tarmoqlarda eʼlon qilingan.
“Xatiko: eng yaxshi do‘st” filmida (2008) jonivor o‘z egasi bilan topishadi.
“Forrest Gamp”da (1994) Jenni Karren to‘ydan hech qancha vaqt o‘tmay turib, OITSdan vafot etmaydi, turmush o‘rtog‘i bilan o‘g‘il farzandini birgalikda tarbiya qiladi.
“Yo‘ldan ozib” serialidagi (2008-2013) Jessi Pinkman giyohvand moddalar qabul qilish natijasida vafot etmagan Jeyn Margolis bilan oila quradi va rafiqasi bilan birga Yangi Zelandiyaga jo‘nab ketadi.
Neyrotarmoq “Leon” (1994) filmi uchun ham baxtli yakun sahnalarini ishladi. Unga ko‘ra, Jan Reno qahramoni otishma vaqtida halok bo‘lmaydi, Matilda voyaga yetguniga qadar unga vasiylik qilishda davom etadi.
“Gladiator” filmida (2000) esa Maksimus halok bo‘lmaydi va oilasi bilan birgalikda baxtli hayot kechiradi.
“Titanik”ning (1997) neyrotarmoq tomonidan yaratilgan yakuniy sahnasida Leonardo Di Kaprio qahramoni Jek qutqaruv qayig‘iga chiqib omon qoladi. Bu mavzu ijtimoiy tarmoqlarda ham ko‘plab muhokamalarga sabab bo‘lgan edi. Foydalanuvchilar so‘nggi sahnada Rouz yotgan qayiq bo‘lagi ustiga Jekning ham bemalol joylashishi mumkinligini uzoq muhokama qilishgan. Qizig‘i shundaki, buni film rejissori Jeyms Kemeronning o‘zi ham tan olgan.
“Yashil makon” (1999) filmining neyrotarmoq tomonidan yaratilgan yakuniy sahnasida Jon Koffi nafaqat qatldan omon qoladi, balki 2 nafar qizaloqni ham qutqarishning uddasidan chiqadi.
“Men afsonaman” filmida (2007) Uill Smit qahramoni va uning sodiq do‘sti zombilar bosqinidan omon qoladilar.
Izoh (0)