“O‘zbekiston bozoridan umidimiz katta” — xitoylik avtomobil ishlab chiqaruvchilar Toshkentga keldi

Xitoylik yirik avtomobil ishlab chiqaruvchilar Toshkent shahridagi EXEED avtosaloniga keldi. Bu haqda EXEED axborot xizmati “Daryo”ga xabar berdi.

Chery holding group kompaniyasi raisi Yin Tongyuye, kompaniya top-menejeri va Chery international prezidenti Zhang Guibing, kompaniyaning Sharqiy Yevropa bo‘yicha bosh menejeri hamda Osiyo-Tinch okeani mintaqasidagi rahbari Liu Jifang O‘zbekistonga keldi. Mehmonlar Toshkentdagi EXEED avtosalonida bo‘lib, O‘zbekistondagi dilerlar bilan hamkorlikni yanada kengaytirish masalalarini muhokama qildi.

Xabarga ko‘ra, Xitoyning yirik kompaniyalari vakillari mahalliy avtomobil bozoridan umidlari katta ekanini bildirgan.

“Mahalliy isteʼmolchilarning o‘sib borayotgan talablarini qondirish uchun mahsulot sifati va xizmat ko‘rsatish darajasini oshiramiz”, —degan mehmonlar.

Uchrashuvda yangi marketing strategiyalari va amalga oshiriladigan bir qator hamkorlik rejalarini ishlab chiqish borasida suhbatlashilgan. Yin Tongyuye dilerlarni ko‘proq qo‘llab-quvvatlash, marketing kompaniyalari, o‘quv dasturlari va sotuv o‘sishiga yordam berish maqsadida O‘zbekistonga ko‘proq investitsiya kiritilishini aytgan.

Mehmonlar O‘zbekistonni hamkorlik borasida yuqori salohiyatga ega, muhim strategik bozor deb bilishini taʼkidlagan.

Maʼlumot uchun, EXEED — yirik avtomobil ishlab chiqaruvchi kompaniya hisoblanib, u jahon isteʼmolchilarini yuqori sifatli avtomobillar bilan taʼminlab kelmoqda.