Islandiyada ayollar erkaklarga qaraganda kam maosh olayotgani uchun ish tashlamoqchi. Aksiyada bosh vazir ishtirok etadi

Islandiyada o‘n minglab ayollar 24-oktyabr kuni gender ish haqi tengsizligiga qarshi norozilik bildirish maqsadida bir kunlik ish tashlash o‘tkazmoqchi. Bu haqda The Guardian xabar berdi.

Islandiya gender tengligi bo‘yicha dunyodagi eng ilg‘or mamlakatlardan biri hisoblanadi. Mamlakat Jahon iqtisodiy forumining yillik Global gender farqi hisobotida 14 yil ketma-ket dunyo mamlakatlari orasida birinchi o‘rinni egallab kelmoqda.

Ish tashlash tashkilotchisi Freya Steyngrimsdottir Islandiya “tenglik jannati” deb atalsa-da, mamlakatda gender tengsizlik hali ham mavjudligi va unga qarshi kurashish uchun “shoshilinch choralar ko‘rish zarur”ligini ko‘rsatmoqchi. Uning so‘zlariga ko‘ra, an’anaviy ravishda ko‘proq ayollarni ish bilan ta’minlaydigan sohalar, masalan, sog‘liqni saqlash va bolalarga g‘amxo‘rlik qilish “yetarlicha baholanmayapti va juda kam haq to‘lanyapti”.

Ayni paytda Freya Steyngrimsdottir, Islandiya Statistika boshqarmasi ma’lumotlariga ko‘ra, mamlakatda hali ham ayollar erkaklarnikidan kamida 20 foiz kam maosh oladigan tarmoqlar mavjudligini ta’kidladi. Islandiya universiteti tomonidan olib borilgan tadqiqot shuni ko‘rsatdiki, islandiyalik ayollarning 40 foizi hayoti davomida gender yoki jinsiy zo‘ravonlikka duchor bo‘lishadi.

Ish tashlash “Siz buni tenglik deysizmi?” shiori ostida o‘tkaziladi. Uning doirasida ishtirokchilar ayollarga pullik va pul to‘lanmaydigan har qanday ishni bajarishdan bosh tortishni taklif qilmoqda (masalan, uy ishlari). Reykyavik markazida 25 ming kishilik marsh rejalashtirilgan.

Islandiya bosh vaziri Katrin Yakobsdottir ish tashlashda ishtirok etishini e’lon qildi.

• Ayollarning bunday keng ko‘lamli ish tashlashi oxirgi marta Islandiyada 1975-yilda bo‘lib o‘tgan.
• O‘shanda Islandiya ayollari erkaklarnikidan o‘rtacha ikki baravar kam maosh olishardi. Ish tashlashda mamlakat ayollarining 90 foizi qatnashgan.
• Aksiya 1976-yilda maktablarda va ish joylarida jinsga qarab kamsitishni taqiqlovchi Tenglik to‘g‘risidagi qonunning qabul qilinishiga olib keldi.
• To‘rt yil o‘tgach, Vigdis Finnbogadouttir konstitutsiyaviy davlat rahbari lavozimiga saylangan dunyodagi birinchi ayol bo‘ldi.