AQSHdagilar Isroil G‘azoda quruqlik operatsiyasini o‘tkazishga tayyor emas deb hisoblamoqda

AQSH Isroil G‘azoda quruqlikdagi operatsiyani o‘tkazish uchun hali aniq reja ishlab chiqmagan deb hisoblaydi. Bu haqda manbalarga tayanib, The New York Times xabar berdi.

Nashr suhbatdoshlariga ko‘ra, Isroil armiyasi qo‘mondonligi bu hujum maqsadli aviazarbalar va maxsus kuchlar guruhlarini qo‘llash bilan bog‘liq operatsiya bo‘ladimi yoki G‘azoga tanklar va piyodalar kiritiladimi — hozircha aniqlab olmagan.

Ikkala variant ham tinch aholi va harbiy xizmatchilarning qurbon bo‘lishiga olib keladi, ammo to‘liq miqyosli operatsiya o‘tkazilsa, yo‘qotishlar ko‘proq bo‘ladi.

Amerika tomonining fikriga ko‘ra, Isroil quruqlikdagi operatsiya davomida qanday maqsadlarga erishish kerakligi haqida aniq tasavvurga ega emas, deydi manbalar. Bu holat Isroil G‘azoda operatsiya o‘tkazishga hali to‘liq tayyor emasligidan xavotir uyg‘otadi.

Axios avvalroq xabar berganidek, AQSH Isroil armiyasiga konsultatsiya o‘tish uchun dengiz piyodalari korpusi general-leytenanti Jeyms Glinni Isroilga yuborgandi. Biroq, Pentagon rasmiylarining ta’kidlashicha, buni AQSH harbiylari Isroil mudofaa kuchlari uchun qaror qabul qiladi deb tushunmaslik kerak.

Amerika OAV manbalariga ko‘ra, AQSH va Yevropa Ittifoqi quruqlikdagi operatsiyani keyinga qoldirishni so‘ragan, buning o‘rniga muzokaralar yo‘li bilan garovga olinganlarni ozod qilishga erishish kerakligi aytilmoqda. Rasmiy ravishda Isroil hukumati AQSH quruqlikdagi operatsiya bo‘yicha hech qanday bosim o‘tkazmayotganini bildirgan.