Xorazm viloyatida yashovchi bir guruh ayollar Umra ziyoratini amalga oshirish paytida o‘g‘rilik sodir etgani haqida asossiz xabarlar tarqatilgandi. “Mening yurtim” telekanalining “Markaziy studiya” dasturida xabar berilishicha, mazkur ish sudda ko‘rib chiqildi.
Sudda maʼlum qilinishicha, 1974-yilda Xiva tumanida tug‘ilgan ayol o‘zi tarqatayotgan xabar yolg‘onligini bila turib, jabrlanuvchi fuqaroni sharmanda qilish maqsadida uni ziyoratga borib, hamma namoz o‘qish uchun masjidga ketgan paytida do‘konlarga kirib, o‘g‘rilik qilgani haqida ovozli xabar va jabrlanuvchining oilasi bilan tushgan rasmini tarqatib, tuhmat qilgan. Tergov jarayonida audioxabar va Telegramʼdagi yozishmalar sudlanuvchiga tegishli ekani tasdiqlangan.
Maʼlum bo‘lishicha, jabrlanuvchi ayol yaqin yillarda Saudiya Arabistoniga bormagan. Umra ziyoratini 2019-yilda amalga oshirgan.
Sud hukmiga ko‘ra, sudlanuvchi ayol Jinoyat kodeksining 139-moddasi (tuhmat) 2-qismi bilan aybli deb topildi va unga 6 oy muddatga ozodlikni cheklash jazosi tayinlandi.
Hukmda sudlanuvchining aybiga iqrorligi, chin dildan pushaymonligi, oilaviy ahvoli va jabrlanuvchi uni kechirgani inobatga olingan.
Izoh (0)