O‘zbekistonda kam ta’minlanganlarga moddiy yordam tayinlash uchun onlayn ariza berish yo‘lga qo‘yiladi

Iqtisodiyot va moliya vazirligi “Ijtimoiy himoya yagona reyestri” axborot tizimi orqali kam taʼminlangan oilalarni aniqlash va ularga ijtimoiy nafaqalar tayinlash bo‘yicha elektron ko‘rinishda ariza berishni joriy etishga oid hukumat qarori loyihasini muhokamaga qo‘ydi.

Hujjat loyihasiga ko‘ra, 2024-yil 1-apreldan boshlab kam taʼminlangan oilalarga bolalar nafaqasi va moddiy yordam tayinlash uchun onlayn ariza berish bo‘yicha davlat xizmati yo‘lga qo‘yiladi.

Bunda, O‘zbekiston prezidenti huzuridagi Ijtimoiy himoya milliy agentligi Raqamli texnologiyalar vazirligi bilan birgalikda 2024 yil 1 aprelga qadar:

• “Ijtimoiy himoya yagona reyestri” axborot tizimi orqali kam taʼminlangan oilalarni aniqlash va ularga ijtimoiy nafaqalar tayinlash hamda maʼlumotnoma taqdim etish bo‘yicha elektron ko‘rinishda davlat xizmatini ko‘rsatishni maʼmuriy reglamentiga muvofiq Yagona interaktiv davlat xizmatlari portali (YAIDXP) orqali joriy etilishini taʼminlaydi;
• davlat xizmatini YAIDXP orqali joriy etish bo‘yicha texnik hujjatlarni tasdiqlasin hamda Adliya vazirligi bilan birgalikda tegishli axborot tizimlarining o‘zaro integratsiya qilinishini taʼminlaydi;
• YAIDXPda davlat xizmatlari ko‘rsatilishining har bir bosqichida murojaatlar ko‘rib chiqilishini kuzatib borish tartibini joriy etadi.

Adliya vazirligi huzuridagi Personallashtirish agentligi 2023-yil 15-noyabrga qadar O‘zbekistondan chiqib ketgan va kelgan mamlakat fuqarolari, O‘zbekiston hududida yashash guvohnomasiga ega bo‘lgan chet el fuqarolari yoki fuqaroligi bo‘lmagan shaxslar to‘g‘risidagi hamda ularning chet elga borish maqsadlari to‘g‘risidagi elektron maʼlumotlarni “Ijtimoiy himoya yagona reyestri” axborot tizimiga “Elektron hukumat” tizimi idoralararo integratsiyalashuv platformasi orqali taqdim etib borilishini yo‘lga qo‘yadi.

Davlat xizmatlarini ko‘rsatishdagi qulayliklar

So‘nggi yillarda davlat xizmatlarini ko‘rsatish jarayonida 73 turdagi hujjat va maʼlumotnomalarning aholidan talab qilinishi bekor qilindi. Shuningdek, 200 dan ortiq tartib-taomillar soddalashtirildi.

Davlat xizmatlarini ko‘rsatishda talab etiladigan hujjatlar soni 221 tadan 95 taga – 43 foizga qisqartirilgan. Birgina 73 turdagi hujjatlarning qisqartirilishi natijasida yiliga o‘rtacha 20 million aholiga qulaylik yaratildi. Ularning 300 milliard so‘mdan ortiq mablag‘i cho‘ntagida qoldi.