“Daryo”ga Qashqadaryo viloyatining Yakkabog‘ tumani hokimi Lutfiddin Abdullayevning tumandagi fermerlarga majburan ariza yozdirib, yerini tortib olishga urinayotgani eshitilgan audio kelib tushdi.
Audioyozuvda hokim fermerlarni qo‘rqitishga uringani, u bilan o‘ynashganlarning ahvoli voyligini aytadi.
O‘tir, yoz deyapman, yoz aytganni qilib, bo‘lmasa 15 sutka olasan, o‘zim ‘pokazaniya’ beraman hokimiyat vakiliga…topshirig‘imni bajarmasin, Elmurodga o‘xshatib olib borib tiqadi. Ikkita-uchta blogerga o‘xshab, yoz. Aytganni qilib, — deydi fermerlardan ariza talab qilgan hokim.
Tuman hokimining fermerlar bilan muloqoti eshitilgan audiodan ma’lum bo‘lishicha, bir nechta fermer ariza yozishdan bosh tortgan va belgilangan rejani bajarayotganini bildirgan.
Fermerlardan biri hokimning bu talabiga javoban, belgilangan rejani 96-97 foiz bajarayotganini aytadi. Hokim bunga e’tibor ham qilmay, kimgadir ariza qanday yozilishi kerakligini aytib turishini, ariza viloyat hokimi yoki viloyat Kadastr boshqarmasi boshlig‘iga yozilishini qo‘shimcha qilgan.
Hokim, shuningdek, fermerlarga belgilangan rejani bajarsa, g‘allasini eksa, arizasini qaytarib olib ketishini aytadi. Biroq ariza yozmagan fermerlarni esa zo‘ravonlarcha avtobusga bosib, tuman IIBga olib borish kerakligini, ular bilan o‘zi gaplashishini, shu paytgacha birortasiga tegmaganini pisanda qiladi.
Hokimni ham tushunish mumkin, u ham tumanning ko‘rsatkichi yaxshilanishi uchun jon kuydiryapti. Cho‘ntagi uchun qilmayapti bu ishlarni. Tan olish kerak, ko‘pchilik tumanlarda eng unumdor yerlarni egallab olib, faqat daromadli mahsulotlar ekib, yerini ijaraga berib, paxta va g‘allani oxirgi o‘ringa qo‘yuvchi fermerlar ham yo‘q emas. Undaylar ham bor, balki ko‘pdir judayam. Ammo ularning aqlini kiritib qo‘yish uchun bunaqa zo‘ravon usuldan foydalanish kerak emas-da, baraka topgur! Qonun bor-ku, qonunning kuchidan foydalaning, hurmatli hokim buva! Va yana bir gap, qaysidir bloger qamalgan bo‘lsa yoki jazolangan bo‘lsa, uni men qildim, mana ko‘rib qo‘y, deb maqtanish kerakmas. Aybdorlarga chora ko‘ruvchi ham ularni javobgar qiluvchi ham bu — qonun, siz emas. Shuni unutmang, — deydi bu haqda fikr bildirgan jamoatchilik vakillaridan biri.
Prezident Shavkat Mirziyoyev 2018-yil hokimlar endi paxta bilan shug‘ullanmasligini aytib, “Hokimlar paxta bilan shug‘ullanmaydi. Ta’lim va ma’naviyat bilan mashg‘ul bo‘ladi”, degandi. 2020-yilda esa O‘zbekistonda paxta hosili uchun davlat rejasi va davlat buyurtmasi tizimidan voz kechilgandi.
O‘zbekiston fermer, dehqon xo‘jaliklari va tomorqa yer egalari kengashi axborot xizmati rahbari Jahongir Rahmonovning “Daryo” so‘roviga javoban bildirishicha, Yer kodeksiga ko‘ra, qishloq xo‘jaligiga mo‘ljallangan yerlarga nisbatan huquqning bekor qilinishi uchun hosildorlik darajasi uch yil mobaynida normativdan (kadastr bahosiga ko‘ra) past bo‘lishi lozim.
Fermerga tegishli yerni ikki xil usulda — o‘zining ixtiyoriy arizasi va sud tartibida olib qo‘yish mumkin. Joylardagi hokimliklar ko‘pincha eng oson usul — ixtiyoriy tarzda yozilishi kerak bo‘lgan arizani bosim o‘tkazib yozdirib oladi va yerni shu tartibda zahiraga qaytarishni mo‘ljallashadi. Bu qonunga zid, — deydi O‘zbekiston fermer, dehqon xo‘jaliklari va tomorqa yer egalari kengashi axborot xizmati rahbari Jahongir Rahmonov tashkilot yuristiga tayanib ma’lumot berar ekan.
Izoh (0)