Nonushta — kunning eng muhim taomi hisoblanadi. Buni e’tiborsiz qoldirmaydigan har bir kishi foydali nonushta tayyorlashni yaxshi ko‘radi. O‘z vaznini kuzatadigan insonlar uchun nonushta odatda mazali va shu bilan birga organizmga zarar yetkazmaydigan bo‘lishi kerak. Quyida sizga kun davomida yaxshi kayfiyat bag‘ishlaydigan, shuningdek, kaloriyalarni yoqishingizga yordam beradigan nonushtaning 3 ta variantini taqdim etamiz.
Suli yormasidan tayyorlanadigan quymoq
Bunday turdagi quymoq maydalangan suli yormasidan tayyorlanadi. Uni oddiy bo‘tqaning mazali muqobili sifatida yoki ta’bingizga qarab har qanday nachinka bilan iste’mol qilishingiz mumkin. Quymoqning ichiga nima solishingiz nafaqat uning mazasiga, balki kaloriyaligiga ta’sir qilishini unutmang.
Quymoq retsepti juda oddiy: 4 osh qoshiq maydalangan suli yormasiga tuxum va 50 ml sut qo‘shing. Bularning barchasini aralashtirish va pishguniga qadar qizdirilgan tovada pishirish kerak.
Tvorog va mevalar
Agar ertalab ovqat yeyishni yoqtirmaydiganlardan bo‘lsangiz, siz uchun rezavorlar yoki mevalar qo‘shilgan tvorog yaxshi tanlov bo‘lishi mumkin. Yog‘ miqdori optimal 5 foiz bo‘lgan tvorogni tanlang, shirinlik uchun unga sevimli rezavor mevalaringizni qo‘shib mazali va foydali nonushta tayyorlang.
Agar shirinliklarni yoqtirmasangiz, tvorogga ko‘katlarni qo‘shishingiz mumkin, u ham mazali va foydali bo‘ladi.
Omlet va sabzavotlar
Oddiy omletga sabzavotlar qo‘shib tayyorlanadigan yegulik ham sizga kerakli energiya va foydali mikroelementlarni beradigan ideal nonushta bo‘ladi. Omlet tezroq hazm bo‘lishini istasangiz sutni suv bilan almashtiring va unga biroz yangi ismaloq qo‘shing.
Izoh (0)