Hamkorbank va Yaponiya xalqaro hamkorlik agentligi o‘rtasida O‘zbekistonda mikro, kichik va o‘rta biznes korxonalarni moliyalashtirish maqsadida kredit shartnomasini imzolash marosimi bo‘lib o‘tdi.
Hyatt Regency Tashkent mehmonxonasida bo‘lib o‘tgan tadbirda Hamkorbank ATB, Yaponiya xalqaro hamkorlik agentligi va Xalqaro moliya korporatsiyasi vakillari ishtirok etdi. Shartnomaga ko‘ra O‘zbekistonda mikro, kichik va o‘rta biznes korxonalarni moliyalashtirish imkoniyatlarini yanada kengaytirish va xususiy sektorga investitsiyalarni oshirish maqsadida 35 million AQSH dollari ajratiladi.
Maʼlumki, mikro, kichik va o‘rta biznes korxonalari jahon mamlakatlari tajribasida o‘zining yuksak natija va muvaffaqiyatlari bilan mustahkam o‘rin egallagan bo‘lib, aksariyat davlatlarda uning yalpi ichki mahsulotdagi ulushi 60-70 foizni tashkil etadi. Jumladan, O‘zbekistonda ham yalpi ichki mahsulotning 54 foizi va ish o‘rinlarining 78 foizi ushbu turdagi korxonalarning hissasiga to‘g‘ri keladi.
“Kichik va o‘rta biznes subyektlarining mamlakat iqtisodiyotidagi muhim o‘rni va salmog‘ini hisobga olgan holda, biz Yaponiya Xalkaro xamkorlik agentligi tomonidan taqdim etilayotgan mablag‘lar va ularni bankimiz tomonidan maqsadli ishlatilishi, mikro, kichik va o‘rta biznes subyektlarini moliyaviy xizmatlardan foydalanish ko‘rsatkichlarini oshirib, O‘zbekiston Respublikasi iqtisodiyotida ijobiy o‘zgarishlarga sabab bulishiga ishonamiz”, — deb taʼkidladi “Hamkorbank” ATB boshqaruvi raisi Baxtiyorjon Jo‘rayev.
Taʼkidlanishicha, mazkur loyiha, O‘zbekistonda mikro, kichik va o‘rta biznes korxonalarinnig barqaror rivojlanishiga, ularni moliyalashtirishga yo‘l ochadi va bu bilan BMT Bosh assambleyasining Barqaror rivojlanish maqsadlarida belgilangan7 8-maqsad (munosib ish o‘rinlarini yaratish va iqtisodiy o‘sish) va 17-maqsadga (ko‘zlangan maqsadlar yo‘lidagi hamkorlik) erishishga hissa qo‘shishi lozim.
“Kichik va o‘rta biznesni rag‘batlantirish mamlakatning keyingi rivoji uchun tobora muhim ahamiyat kasb etmoqda. O‘zbekiston iqtisodiyotida ham, ularning ishonchli kredit bozoriga kirish imkoniyatlarini yaxshilash masalasida shoshilinch choralar ko‘rilmoqda. Jumladan, 2022—2026-yillarga mo‘ljallangan Yangi O‘zbekistonning taraqqiyot strategiyasida ham ushbu masalaga alohida eʼtibor qaratilgan. Umid qilamanki, kelishuv natijasida ajratilayotgan kredit mablag‘lari O‘zbekiston hukumati tomonidan belgilangan ustuvor maqsadlarga yanada tezroq erishish imkonini beradi – deb, fikr bildirdi Yaponiya xalqaro hamkorlik agentligi katta vitse-prezidenti Imoto Sashiko.
Ushbu kredit mablag‘lari rivojlanayotgan mamlakatlarda moliyaviy xizmatlardan foydalanish darajasini oshirishga ko‘maklashish uchun 2023-yilning may oyida joriy qilingan 1,5 milliard AQSH dollari miqdoridagi qarz dasturi – Moliyalashtirishni tezlashtirish mexanizmi (FAFI) asosida Xalqaro moliya korporatsiyasi bilan hamkorlikda moliyalashtiriladi.
“Loyihaga jahon miqyosidagi nufuzli moliya instituti – Xalqaro moliya korporatsiyasi jalb etilishi muhim ahamiyatga ega, chunki ushbu voqea xususiy investorlarning eʼtiboriga sabab bo‘ladi, natijada O‘zbekistonga yanada ko‘proq investitsiya mablag‘lari kiritiladi”, — deb, qo‘shimcha qildi Imoto Sashiko xonim.
Maʼlumot uchun:
Yaponiya xalqaro hamkorlik agentligi iqtisodiy infratuzilmani yangilash va takomillashtirish, bozor iqtisodiyotiga o‘tishni jadallashtirish maqsadida inson resurslarini va institutsional tuzilmalarni rivojlantirishga ko‘maklashish, iqtisodiyot va sanoatni rag‘batlantirish, shuningdek, ijtimoiy sektorni (sog‘likni saqlash, qishloq xo‘jaligi va qishloq hududlarini rivojlantirish) qayta tizimlashga ko‘maklashish singari ustuvor sohalardagi loyihalarni amalga oshirib keladi. Agentlikning Toshkent shahridagi vakolatxonasi o‘z faoliyatini 1999-yilda boshlagan.
Hamkorbank ATB 1991-yilda tashkil etilgan, mamlakat bo‘yicha 153 ofisdan iborat yirik tarmoqqa ega. Bank mikromoliyalash ko‘rsatkichlari bo‘yicha respublikaning eng yirik banklar uchligiga kiradi. Banking asosiy faoliyati O‘zbekiston iqtisodiyotining real sektorini kreditlash, raqobatbardosh mahsulotlar ishlab chiqarishni rag‘batlantirish va yangi ish o‘rinlari yaratish maqsadida texnik va texnologik modernizatsiya loyihalarini moliyalashtirishdan iborat. Bank faoliyatida kichik biznes va xususiy tadbirkorlikni moliyalashtirish ustivor ahamiyatga ega.
Reklama huquqi asosida.
Izoh (0)