The New York Times manbalarining xabar berishicha, Isroil shu hafta oxirida G‘azo sektorida quruqlikdagi operatsiyani boshlashni rejalashtirgan edi, ammo noqulay ob-havo tufayli uni keyinga qoldirdi.
Nashrning yozishicha, Isroil G‘azo shahrini egallash uchun o‘n minglab askar, tank, sapyor va maxsus kuchlarni yuboradi. Maqsad, shuningdek, HAMASning yuqori siyosiy va harbiy rahbariyatini yo‘q qilishdir.
NYT ma'lumotlariga ko‘ra, operatsiya 2006-yildagi Isroil-Livan mojarosidan keyingi eng yirik operatsiya bo‘lishi mumkin. Qayd etilishicha, Isroil G‘azo qo‘lga kiritilgach, nima qilishni rejalashtirayotgani hozircha noma’lum.
Isroil HAMAS garovga olinganlarni o‘ldirishi, tinch aholidan tirik qalqon sifatida foydalanishi va tuzoq o‘rnatishini istisno qilmaydi.
Isroil va HAMAS o‘rtasidagi urush 7-oktyabr kuni Isroil hududiga yuzlab raketalar otilgani va ayrim aholi punktlari falastinliklar tomonidan bosib olinishi bilan boshlangan. Isroil o‘z hududlari ustidan nazoratni qayta tiklaganidan so‘ng quruqlikdagi operatsiyaga tayyorgarlik ko‘ra boshladi. U G‘azo sektorini blokadaga oldi va anklavning shimoliy qismidagi 1,1 million aholini qisqa muddat ichida janubga evakuatsiya qilishni talab qildi.
Izoh (0)