Putin: “Falastin muammosi har bir musulmonning qalbida”

Rossiya prezidenti Vladimir Putin Isroil va Falastin o‘rtasida davom etayotgan urushga munosabat bildirdi.

U Isroilning “joylashuv siyosati”ni zo‘ravonlikning yangidan avj olishining sabablaridan biri deb atadi va Falastin muammosi har bir musulmonning qalbida ekanini hamda ular tomonidan adolatsizlik sifatida qabul qilinishini ta’kidladi.

Putin Isroil tashkil etilganda suveren Falastin davlatini yaratish haqida ham gapirilganini, ammo bu hech qachon amalga oshirilmaganini eslatdi. Uning so‘zlariga ko‘ra, AQSH siyosiy muammolarni hal qilish o‘rniga Falastinga “sadaqa” berish bilan shug‘ullanib kelgan.

“AQSH arab-isroil mojaro zonasidagi mexanizmlarni e’tiborsiz qoldirdi. Keyin esa hamma narsani bir o‘zi tuzatishga qaror qildi. So‘nggi yillarda ular falastinliklarning moddiy ehtiyojlarini qondirishga e’tibor qaratdi. Aslini olganda, ular xalqning haqiqiy muammolarini hal qilish o‘rniga ularga “sadaqa” tashlab turishga harakat qildi. Biz har doim aytganmiz, fundamental masalalarni hal qilmasdan turib, hech narsani o‘zgartirib bo‘lmaydi”, — dedi Rossiya prezidenti.

Prezident Isroil va HAMASni “ayollarni tinch qo‘yishga” va erkaklarga o‘zaro jang qilishga imkon berishga chaqirdi. “Rossiya Isroil va Falastin o‘rtasidagi g‘azab juda katta ekanini tushunadi, ammo tinch aholi o‘rtasidagi yo‘qotishlarni minimallashtirib, bolalar va ayollarni o‘z holiga qo‘yish kerak”, — dedi Putin.

Uning so‘zlariga ko‘ra, mojaroning kengayishi jiddiy oqibatlarga olib kelishi mumkin, jumladan, energetika sohasida ham.