Bank nazorati qo‘mitasi tomonidan Markaziy bankning nazoratga doir vazifalari ijrosini taʼminlash maqsadida 2023-yilning sentyabr oyidagi yig‘ilishlarida qoidabuzarliklar sodir etgan qator tijorat banklari ogohlantirildi.
Qayd etilishicha, o‘tgan oyda bitta tijorat banki va bitta to‘lov tashkilotining ayrim operatsiyalarini amalga oshirishiga cheklov o‘rnatilgan hamda 13 ta tijorat banki faoliyatida qoidabuzarliklar aniqlangani sababli chora va sanksiyalar qo‘llanishi to‘g‘risida ogohlantirilgan.
Shuningdek, 6 ta tijorat bankiga nisbatan jarima chorasi qo‘llangan hamda ustav kapitali qonunchilik talablariga muvofiq shakllantirilmagani munosabati bilan bitta tijorat bankining aktiv va passiv operatsiyalarini to‘xtatish hamda to‘rtta to‘lov tashkilotidan faoliyatni amalga oshirish huquqini beruvchi litsenziyalarini chaqirib olish to‘g‘risida qarorlar qabul qilindi.
“Tijorat banklari boshqaruvlari zimmasiga aniqlangan kamchiliklarni bartaraf etish, ehtimoliy yo‘qotishlarga qarshi zaxiralarni yaratish, shuningdek, Markaziy bank tomonidan o‘rnatilgan prudensial normativlarga amal qilish, bank faoliyatida mavjud zaifliklarni bartaraf qilish va moliyaviy holatni sog‘lomlashtirish bilan bog‘liq talablarga rioya etish yuzasidan tegishli ko‘rsatmalar berildi va vazifalar yuklatildi”, — deyiladi xabarda.
Eslatib o‘tamiz, 2022-yilda 26 ta bankdan 3,8 milliard so‘m miqdorida jarimalar undirilgan edi. Bir necha kun oldin esa Markaziy bank “AVO bank” (sobiq “O‘zagroeksportbank”) depozit va kredit operatsiyalari to‘xtatilganini maʼlum qildi.
Izoh (0)