O‘zbekistonning shimoli-g‘arbiy hududlariga kirib kelgan nam havo massalari respublikaning barcha hududlariga tarqalmoqda. Bu haqda “O‘zgidromet” xabar berdi.
Qayd etilishicha, 7-oktyabrga o‘tar kechasi hududning katta qismida bulutli ob-havo bo‘lishi kutilmoqda, baʼzi joylarda yomg‘ir yog‘adi, ayrim joylarda shamol tezligi 13-18 metr/sekundgacha kuchayadi. Havo harorati kechagi kunga nisbatan 6-8 darajaga past bo‘lib, 18-23 darajani tashkil etadi.
Ertaga kunduzi nam havo massasi O‘zbekiston hududidan chekina boshlaydi va respublika bo‘yicha yana yog‘ingarchiliksiz ob-havo kuzatiladi, faqat ertalabki soatlarda markaziy va sharqiy viloyatlarning ayrim joylarida biroz yomg‘ir yog‘ishi mumkin. Yakshanba kuni esa O‘zbekistonning barcha hududlari bo‘yicha yog‘ingarchilik kutilmaydi.
Dam olish kunlari havo harorati asta-sekin ko‘tariladi va yakshanba kuni 22-27 darajani tashkil etadi. Kechasi va ertalab salqin bo‘lishi kuzatiladi, havo harorati 9-14 daraja atrofida bo‘ladi.
Respublikaning tog‘ oldi va tog‘li hududlarida 6-8-oktyabr kunlari vaqti-vaqti bilan yomg‘ir yog‘adi. 6-7-oktyabrda baʼzi joylarda kuchli bo‘ladi, sel-suv toshqin hodisalari yuzaga kelishi mumkin. Baland tog‘li hududlarda yomg‘ir qorga aylanishi ehtimoli bor.
Izoh (0)