2022-yil qish yakunida Rossiya va Gruziya chegarasida 160 kilometrgacha uzunlikdagi avtomobillar tirbandligi yuzaga kelgan. Unda o‘zbek yuk avtomobillari haydovchilari ham bo‘lgan. Bu haqda O‘zbekiston xalqaro avtomobilda tashuvchilar uyushmasi raisi Sanjar Po‘latov “Daryo”ga bergan intervyusida aytdi.
.jpg)
Sanjar Po‘latovning taʼkidlashicha, tirbandlikda qolib ketgan o‘zbekistonlik haydovchilarga elchixona tomonidan yordam ko‘rsatilgan.
“Haydovchilarimiz haqiqiy qahramon. Sababi yo‘lda juda ko‘p qiyinchiliklar, muammolar bo‘lishiga qaramasdan ular o‘z kasbini sevib davom ettirishadi. Ayniqsa, havo harorati juda sovuq bo‘ladigan hududlardagi muzlamalarda qolib, navbatlarda 10-15 kunlab kutib ishlash oson emas. Masalan, Ukraina voqeasi (Rossiya–Ukraina urushi) boshlanganda (2022-yil, fevral) “Verxniy Lars”, yaʼni Rossiya bilan Gruziya chegara punktida katta–katta tirbandliklar yuzaga kelgan. Tirbandlikning uzunligi 160 kilometrgacha yetib, Checheniston tomonlargacha borgandi. Oqibatda haydovchilar o‘sha hududda bir oygacha qolib ketdi. Bu jarayonda Rossiyadagi elchixonamiz vakillari borib, o‘zimizning haydovchilar holidan xabar olib turishdi. Ularga kerakli oziq-ovqat va boshqa masalalarda yordam berildi”,—dedi u.
Suhbat davomida Sanjar Po‘latov Ukrainaga Rossiya hujumi boshlangan paytda urush ketayotgan hududda 100 nafardan ortiq o‘zbekistonlik haydovchilar qolib ketgani haqida gapirdi.
“Besh nafar haydovchimiz Mariupolda qolib ketgandi. Ularni vatanga olib kelish uchun hukumat komissiyasi tuzildi. Bizga Rossiya va Ukraina elchixonalari, Xalqaro avtotransport ittifoqi yordam berdi. Haydovchilarimiz O‘zbekistonga juda qiyinchilik bilan olib kelindi. Ularga marshrutlar chizib berilgan va shu orqali Ukraina hududidan chiqib ketishgan. Mariupolda qiyin bo‘lgan. Elchixonalarimiz rosa ishlashgan. Masʼullar: “imkoni bo‘lsa, samolyot qo‘yib berardik, lekin iloji yo‘qda”, deyishgan. To‘rt nafar odam uchun samolyot qo‘yib berishga ham tayyor bo‘lishgan. Biroq u paytda Mariupol butunlay blokadada edi. Juda qiynalganmiz. Ammo eson–omon chiqishdi. Shuning uchun ham men ularni qahramon deyman”, — dedi mutaxassis.
Avvalroq Toshkent shahrida “Xalqaro avtomobil transporti: barqaror rivojlanish va farovonlik sari” mavzusida xalqaro anjuman o‘tkazilgani xabar qilingandi. Tadbirda hozirgi kunda O‘zbekistonning eksport–import yuklarining 68 foizini milliy tashuvchilar tashiyotgani, ilgari bu ko‘rsatkich 30 foizga ham yetmagani aytilgan. Shu bilan birga, O‘zbekistonda 5–7 ming nafar yuk avtomobillari haydaydigan yuqori malakali haydovchiga ehtiyoj borligi taʼkidlangan.
Izoh (0)