Markaziy bank “AVO bank” (sobiq “O‘zagroeksportbank”) depozit va kredit operatsiyalari to‘xtatilganini maʼlum qildi.

Qayd etilishicha, “Banklar va bank faoliyati to‘g‘risida”gi qonunga muvofiq, bank ustav kapitalining eng kam miqdori 2023-yil 1-sentyabrdan eʼtiboran 200 mlrd so‘mni tashkil etishi kerakligi belgilangan.

“Bugungi kun holatiga “AVO bank”ning ustav kapitali 105 mlrd so‘mni tashkil etgan holda bank ustav kapitali miqdori qonunchilik talablariga muvofiqlashtirilmagan. Banklar va bank faoliyati to‘g‘risidagi qonunchilikka muvofiq, Bank nazorati qo‘mitasi qaroriga asosan bankka nisbatan kreditlash va boshqa xarajatlarni moliyalashtirish hamda depozit operatsiyalarini amalga oshirish taqiqlandi”, — deyiladi Markaziy bank xabarida.

Maʼlumot uchun, 2022-yil dekabrda “O‘zagroeksportbank” (hozirgi “AVO bank”) ustav kapitalidagi 100 foiz davlat aksiyalar paketi Support Level MCHJga hech qanday tendersiz 5 million dollarga sotilgandi.

Joriy yilning 13-sentyabr kuni Markaziy bank “O‘zagroeksportbank” ATB nomi “AVO bank”ga o‘zgarganini va bankka berilgan litsenziya qayta rasmiylashtirilganini maʼlum qilgan.