Ukraina Korrupsiyaning oldini olish milliy agentligi Xitoyning uchta yirik neft va gaz kompaniyasini “xalqaro urush homiylari” ro‘yxatiga kiritdi. Bu haqda tashkilot matbuot xizmati o‘zining Telegram kanalida ma’lum qildi.

Gap neftni qazib olish va qayta ishlashga ixtisoslashgan CNOOC Group va Sinopec Group kompaniyalari, shuningdek, Xitoyning eng yirik milliy neft va gaz korporatsiyasi bo‘lgan China National Petroleum Corporation haqida bormoqda.

Ukraina Korrupsiyaning oldini olish milliy agentligining aniqlik kiritishicha, ushbu kompaniyalarning barchasi “Rossiya bilan qo‘shma loyihalarni amalga oshirishda davom etayotgani” uchun ro‘yxatga kiritilgan.

Avvalroq agentlik ushbu ro‘yxatga olmos bozorining eng yirik o‘yinchisi bo‘lgan Hindistonning Shree Ramkrishna Exports kompaniyasini kiritgan edi.

Shuningdek, Ukrainaning mazkur ro‘yxatida Aliexpress onlayn-tijorat platformasiga egalik qiluvchi Xitoyning Alibaba Group Holding Limited kompaniyalar guruhi, Avstriyaning Raiffeisen Bank guruhi, dunyodagi eng yirik port operatorlaridan biri DP World (BAA), Procter&Gamble, Leroy Merlin, Auchan va boshqa kompaniyalar ham bor.