Ozarbayjonning harbiy amaliyoti va tan olinmagan respublika aholisining ommaviy ko‘chib ketishidan so‘ng Qorabog‘da 50 dan 1000 gacha etnik armanlar qoldi. Bu haqda hududga tashrif buyurgan BMT missiyasi ma’lum qildi.
BMTning Ozarbayjondagi doimiy koordinatori Vladanka Andreyeva boshchiligidagi missiya 30 yil ichida birinchi marta Qorabog‘ga keldi. BMT xodimlari Agdamdan Xankendiga (Stepanakert) tashrif buyurdi.
“Missiya tashrif buyurgan shahar qismlarida fuqarolik jamoat infratuzilmasi, jumladan, shifoxonalar, maktablar va turar-joy binolari, madaniy va diniy obidalarga hech qanday zarar yetkazilmagan”, — deyiladi hisobotda.
Shu bilan birga, missiya “mahalliy aholining uylarini qanchalik tez tark etgani va ular boshdan kechirgan azob-uqubatlardan” hayratda ekanini bildirdi.
19-sentyabr kuni Ozarbayjon hukumati Qorabog‘da “konstitutsiyaviy tuzumni tiklash bo‘yicha aksilterror choralari”ni e’lon qildi va o‘zini o‘zi e’lon qilgan respublika hududini o‘qqa tuta boshladi. Ertasi kuni o‘t ochishni to‘xtatish to‘g‘risida kelishib olindi va 28-sentyabr kuni tan olinmagan Tog‘li Qorabog‘ respublikasi prezidenti Samvel Shahramanyan farmonga imzo chekdi, unga ko‘ra “respublika” 2024-yil 1-yanvardan o‘z faoliyatini to‘xtatadi.
3-oktyabr kuni Nikol Pashinyanning matbuot kotibi Nazeli Bagdasaryan Qorabog‘dan Armanistonga 100 625 etnik arman ko‘chib kelganini ma’lum qildi. Konflikt boshlanishidan oldin “respublika” aholisi 120 ming kishiga baholangan.
Izoh (0)