O‘zbekistonda barqaror rivojlanish madaniyatini ilgari surish hamda bolalar va yoshlarni iqlim kun tartibiga jalb qilish bo‘yicha milliy strategiya hamda “yo‘l xaritasi” imzolandi. Bu haqda Ekologiya, atrof-muhitni muhofaza qilish va iqlim o‘zgarishi vazirligi xabar berdi.
Milliy strategiya tashabbusi eko-faollar, shu jumladan, imzolash marosimida ishtirok etgan Eco-schools Uzbekistan loyihasi a’zolari tomonidan ilgari surilgan. Eko-faollar strategiyani YUNISEF va YUNESKO xalqaro ekspertlari ko‘magida GEP tavsiyalarini hisobga olgan holda ishlab chiqish jarayonining teng huquqli ishtirokchisi bo‘ldi.
Strategiya bolalar va yoshlarning iqlim o‘zgarishiga qarshi kurashishdagi rolini e’tirof etish, ularning sohadagi faol ishtirokini ta’minlash, shu jumladan, o‘quv jarayonida asosiy e’tiborni bilim berishdagi muammolarni o‘rganish va yechimlarni izlashga yo‘naltirishni nazarda tutadi.
Strategiya “yashil” ta’lim va barqaror rivojlanish tizimini izchil shakllantirish uchun tayanch hujjat bo‘lib xizmat qilishi lozim. Unda sifatli ekologik ta’limning asosiy tamoyillari qayd etilgan: uzluksizlik, fanlararo bog‘liqlik, fundamentallik va komplekslik.
Yoshlar strategiyasining asosiy vazifalari quyidagilar:
- “yashil” ta’limni ilgari surish bo‘yicha milliy siyosat va harakatlar rejasini ishlab chiqish hamda zarur o‘quv resurslarini yaratish;
- bolalar va yoshlarning iqlim o‘zgarishiga qarshi kurashdagi sa’y-harakatlarini qo‘llab-quvvatlash va faollashtirish uchun turli manfaatdor tomonlar o‘rtasida sheriklik munosabatlari va hamkorlikni rivojlantirish hamda avlodlar o‘rtasidagi hamkorlikning muhim rolini e‘tirof etish;
- maktabgacha va maktab ta‘limi muassasalarida “yashil” hamjamiyatni yaratish.
Bundan oldin O‘zbekistondagi 4 ta viloyatda yoshlarning ekologiya va fermerlik borasidagi bilimlarini oshiruvchi maxsus o‘quv markaz tashkil etilishi, mamlakatda ekologik auditorga malaka sertifikati berish bo‘yicha davlat xizmatlari ko‘rsatilishi to‘g‘risida xabar berilgandi.
Izoh (0)