29-sentyabr kuni Nyu-York shtati gubernatori Nyu-York shahrida favqulodda holat e’lon qildi. Kuchli yomg‘irdan keyin shtatning bir qancha yirik shaharlari suv ostida qolgan.
Shtat gubernatori Keti Xoukul Twitter’da Nyu-York shahri, Long-Aylend va Gudzon vodiysi kuchli yomg‘irdan aziyat chekkanini aytdi.
“Men Nyu-York shahri, Long-Aylend va Gudzon vodiysida biz butun mintaqada kuzatilayotgan kuchli yog‘ingarchilik tufayli favqulodda holat e’lon qilaman. Iltimos, xavfsizlik choralarini ko‘ring va suv bosgan yo‘llarda harakatlanmang”, — deb yozdi gubernator.
29-sentyabr kuni Bruklinda bir necha soat ichida 11 santimetrdan ortiq yomg‘ir yog‘di, bu bir oylik me’yorga teng. Manxettenda bor-yo‘g‘i bir soat ichida yarim oylik yog‘ingarchilik kuzatildi.
Shaharda uylarning yerto‘lalari va birinchi qavatlarini suv bosgan, ayrim metro bekatlari ishlashdan to‘xtadi, ular atrofidagi yo‘llar yopildi.
Ayni paytda Nyu-York shtati shaharlari aholisi suv bosgan ko‘chalar tasvirini bo‘lishmoqda.
“Bruklin, Nyu-York suv ostida qoldi. Shahar infratuzilma haqida qayg‘urmayapti. Aholi birin-ketin ofatlarni yengishga majbur bo‘lmoqda”, — deb yozadi shahar aholisi.
Nyu-York politsiyasi kuchli yomg‘ir tufayli ba’zi hududlarda qutqaruv ishlarini olib borgan.
Izoh (0)