Las-Vegas politsiyasi 1996-yilda reper Tupak Shakurning o‘ldirilishi bo‘yicha tergov doirasida gumonlanuvchini hibsga oldi. Bu haqda Associated Press xabar bermoqda.
Qo‘lga olingan shaxs 60 yoshli giyohvand moddalar sotuvchisi Dueyn Devis bo‘lib, u Kif Di nomi bilan ham tanilgan. U ilgari ham qotillikda ayblangan.
AP ta’kidlashicha, taxminan ikki oy oldin politsiya Tupak Shakurning qotilligi yuzasidan tergov doirasida Devisning rafiqasi uyida tintuv o‘tkazgan.
Tupak Shakur tarixdagi eng nufuzli rep ustalaridan biri edi, uning faoliyati xip-xopning rivojlanishi va ommalashishiga katta ta’sir ko‘rsatdi.
Tupak Shakur 1996-yil sentyabr oyida 25 yoshida vafot etdi. Musiqachi o‘tirgan mashinaga boshqa mashinadan o‘q uzilgan. U ko‘plab jarohatlar olgan va olti kundan keyin kasalxonada vafot etgan.
Tupak Shakurning o‘ldirilishi bo‘yicha tergovda hozirgacha hech kim hibsga olinmagan edi. Avval Davis bu ishda guvoh sifatida ko‘rsatilgan. 2018-yilda u o‘q uzilgan mashinada bo‘lganini tan oldi — ammo otishmani Tupak bilan janjallashib qolgan jiyani Orlando Anderson uyushtirganini aytdi. Anderson 1998-yilda o‘ldirib ketilgan; o‘limiga qadar u Shakurning qotilligiga aloqadorligini qat’iyan rad etib kelgan.
Izoh (0)