28-sentyabr kuni Toshkent shahri Sergeli tumanida joylashgan omborxonada portlash yuz berdi. Oqibatda 26 ta ko‘p qavatli uydagi 592 ta xonadon hamda 8 ta xizmat ko‘rsatish shoxobchasi, 1 ta maktab va 2 ta bog‘cha binolarining fasad qismi hamda deraza-romlariga zarar yetgan. Shuningdek, hududdagi 24 ta ko‘p qavatli uy va 25 ta hovlining fasad, oyna-rom va tom qismi zarar ko‘rgan. Respublika sud ekspertiza markazi davlat sud eksperti Javohir Do‘stmatov “Daryo” muxbiri bilan suhbatda uy-joylar va avtomobillarga yetgan zarar miqdori o‘rganilayotganini aytdi.
Javohir Do‘stmatovning maʼlum qilishicha, portlash oqibatida omborxona atrofidagi har bir ko‘p qavatli uyga 500 million so‘mdan 1 milliard so‘mgacha zarar yetgan.
“Hozirda 20 nafardan ortiq ekspertlarimiz hodisa joyida o‘rganishlarni davom ettirmoqda. Markazimiz tomonidan har bir xonadon egalari bilan individual suhbatlashilib, hisob–kitob ishlari olib borilyapti. Portlash oqibatida yuzaga kelgan yong‘in bo‘yicha ham tadqiqotlar o‘tkazilmoqda.
Kuchli portlash taʼsirida asosan, uy-joylar va ularning jihozlari, avtomobillarga zarar yetgan. Zarar miqdorini to‘g‘ridan to‘g‘ri aniqlash imkoni yo‘qligi sababli tegishli tartibda boshqa soha vakillari, xususan, loyiha–smetalar bo‘yicha mutaxassislar bilan tadqiqot olib borilmoqda. Natijalar bo‘yicha xulosalarni taqdim etamiz. Chunki ochiqlashga maʼlumotlar jamlangani yo‘q”, — dedi mutaxassis.
Avvalroq Toshkent shahrining Sergeli tumanidagi portlashdan so‘ng shahar hokimi Shavkat Umrzoqov hududdagi mavjud tuman hokimlariga portlashdan zarar ko‘rgan xonadonlar hamda ijtimoiy soha obyektlarini qisqa muddatda taʼmirlash kerakligi haqida topshiriq bergandi. “Daryo” ijodiy jamoasi shahar hokimi topshirig‘idan so‘ng, o‘tgan fursat davomida “Quruvchilar” mahallasida qanday ishlar amalga oshirilgani bilan qiziqib, masʼullar hamda aholini suhbatga tortgan.
Izoh (0)