Toshkent shahar hokimi vazifasini bajaruvchi Shavkat Umurzakov poytaxtning 12 tumani hokimliklariga favqulodda hodisadan zarar ko‘rgan obyekt va hududlarni tiklash bo‘yicha vazifalarni taqsimladi. Bu haqda Toshkent shahar hokimligi matbuot xizmati xabar berdi.
Xususan, Mirzo Ulug‘bek tumaniga Sergeli tumani “Quruvchilar” mavzesidagi 20 va 30-sonli ko‘p qavatli uylar ta’mirlash va tiklash uchun biriktirilgan.
Bektemir tumaniga esa mavzesdagi 2 va 4-sonli, Yunusobod tumaniga 12, 13, 14, 15 va 16-sonli ko‘p qavatli uylarni ta’mirlash va tiklash uchun biriktirildi.
Yakkasaroy tumaniga biriktirilgan “Quruvchi” mahallasidagi 21-sonli ko‘p qavatli uylardagi zarar yetgan xonadonlar ta’mirlab berish ishlari boshlangani sababli tuman hokimligi tomonidan to‘rtta oila Yakkasaroy tumanidagi Anvar’s guests mehmonxonasiga joylashtirilgan.
Sergeli tumanida kuchli portlash
Toshkent shahri Sergeli tumanidagi “Quruvchilar” dahasida Inter Logistics MCHJga qarashli omborxonada kuchli portlash va yong‘in 28-sentyabr kuni tunda sodir bo‘lgandi. Hodisa oqibatida jabrlanganlarning umumiy soni 163 kishini tashkil etdi, bir nafar o‘smir hodisa oqibatida vafot etdi. Mazkur holat yuzasidan IIV Tergov departamenti tomonidan Jinoyat kodeksining 259-moddasi (yong‘in xavfsizligi qoidalarini buzish) 2-qismi “a” va ”b” bandlari bilan jinoyat ishi qo‘zg‘atildi.
Sodir bo‘lgan favqulodda hodisani o‘rganish, ko‘rilgan talafotlarni bartaraf etish va jabrlanganlarga yordam ko‘rsatish bo‘yicha prezident topshirig‘iga ko‘ra hukumat komissiyasi tuzildi. Unga ko‘ra, komissiya favqulodda holat oqibatida zarar yetkazilgan har bir uy-joyni, jumladan, aholi xonadonlari, ko‘p qavatli uy-joylarning fasad qismlari, deraza va romlari hamda ta’mirtalab ahvolga kelib qolgan boshqa bino va inshootlarga yetkazilgan zararlarni bartaraf etish bo‘yicha moddiy yordam ko‘rsatish choralarini ko‘radi.
Izoh (0)