Toshkentning Sergeli tumanida yuz bergan favqulodda holat sabablarini o‘rganish, ko‘rilgan talafotlarni bartaraf etish va jabrlanganlarga yordam ko‘rsatish maqsadida Shavkat Mirziyoyev topshirig‘iga muvofiq Vazirlar Mahkamasi farmoyishi qabul qilindi.
Farmoyish bilan bosh vazir o‘rinbosari Ochilboy Ramatov boshchiligida 16 kishidan iborat hukumat komissiyasi tuzildi. Komissiya zimmasiga uch kun muddatda omborxonada yuz bergan favqulodda holat sabablarini o‘rganish, ko‘rilgan talafotlarni bartaraf etish va jabrlanganlarga tibbiy va psixologik yordam ko‘rsatish bo‘yicha tezkor chora-tadbirlarni amalga oshirish yuklatildi.
Shuningdek, favqulodda holat oqibatida zarar yetkazilgan har bir uy-joyni, jumladan, aholi xonadonlari, ko‘p qavatli uy-joylarning fasad qismlari, deraza va romlari hamda ta’mirtalab ahvolga kelib qolgan boshqa bino va inshootlarga yetkazilgan zararlarni bartaraf etish bo‘yicha moddiy yordam ko‘rsatish choralarini ko‘radi.
Shuningdek:
- mazkur komissiya a’zolari favqulodda holat yuz berishining texnik va boshqa sabablarini, favqulodda holatni tavsiflovchi ashyoviy dalillarni;
- yong‘in sodir bo‘lgan ob’yektda ishlatilayotgan texnika qurilmalari sanoat va yong‘in xavfsizligi talablariga muvofiqligini;
- zarar ko‘rgan har bir uy-joyni xatlovdan o‘tkazib, xususiy mulkdorlar xonadonlariga, ko‘p qavatli uy-joylarning fasad qismlari hamda ta’mirtalab ahvolga kelib qolgan boshqa bino va inshootlar holatini;
- o‘rganish natijalariga ko‘ra bajariladigan ish turlarini aniqlagan holda har bir uy-joy (obyektlar) bo‘yicha manzilli chora-tadbirlarni belgilash holatini;
- omborxonada sanoat va yong‘in xavfsizligi sohasidagi qonunchilik hujjatlari, shuningdek, texnik jihatdan tartibga solish sohasidagi normativ hujjatlar talablariga rioya etilganligi yuzasidan o‘tkazilgan o‘rganishlar (tekshirishlar) va ularda aniqlangan kamchiliklarni bartaraf etish bo‘yicha ko‘rilgan choralarni o‘rganib chiqadi.
Yong‘in sodir bo‘lgan obyektda favqulodda holatga olib kelishi mumkin bo‘lgan boshqa omillarni aniqlaydi va tekshirish natijalari bo‘yicha Vazirlar Mahkamasiga axborot kiritadi.
Sergelidagi omborxonadagi portlash
Toshkent shahri Sergeli tumanidagi “Quruvchilar” dahasida Inter Logistics MCHJga qarashli omborxonada kuchli portlash va yong‘in 28-sentyabr kuni tunda sodir bo‘lgandi. Uning oqibatida MCHJga qarashli 18,4 gektar yer maydonda joylashgan omborxonada taxminan 10 000 kvadrat metr maydonda yong‘in kelib chiqqan.
Hodisa oqibatida jabrlanganlarning umumiy soni 163 kishini tashkil etdi, bir nafar o‘smir hodisa oqibatida vafot etdi. Mazkur holat yuzasidan IIV Tergov departamenti tomonidan Jinoyat kodeksining 259-moddasi (yong‘in xavfsizligi qoidalarini buzish) 2-qismi “a” va ”b” bandlari bilan jinoyat ishi qo‘zg‘atildi.
Izoh (0)