Prezident yordamchisi Saida Mirziyoyeva Sergelidagi portlash oqibatida jabrlanganlarning oila aʼzolariga hamdardlik bildirdi.
Saida Mirziyoyeva, shuningdek, bugun beminnat yordam qo‘lini cho‘zayotgan barchaga, birinchi navbatda, tegishli idoralar bilan birgalikda oziq-ovqat, boshpana va psixologik yordam ko‘rsatgan poytaxt aholisiga minnatdorlik bildirdi.
“Bugun beminnat yordam qo‘lini cho‘zayotgan barchaga, birinchi navbatda, tegishli idoralar bilan birgalikda oziq-ovqat, boshpana va psixologik yordam ko‘rsatgan poytaxtimizning jonkuyar aholisiga minnatdorlik bildiraman.
Qutqaruvchilar — Favqulodda vaziyatlar vazirligi, Ichki ishlar vazirligi, Mudofaa vazirligi, Milliy gvardiya xodimlariga, tez tibbiy yordam shifokorlariga alohida rahmat aytaman. Agar o‘z vaqtida tegishli choralar ko‘rilmaganda fojia oqibatlari bundan-da yomon bo‘lishi mumkin edi.
Sizlar — mamlakatimizning haqiqiy vatanparvarlarisiz.
Ishontirib aytmoqchimanki, Prezidentimiz topshiriqlari bilan fojia oqibatlarini tezda bartaraf etish uchun barcha imkoniyatlar ishga solingan. Davlatimiz rahbari uchun har bir fuqaro muhim va qadrli. Fursatdan foydalanib, jabrlanganlarning oila aʼzolariga o‘zimizning chuqur hamdardligimizni bildiramiz.
Bunday kunlar bizni ham birlashtiradi, ham sinaydi. Barchamiz mavjud vaziyatdan to‘g‘ri saboq chiqaramiz, deb umid qilaman.
Yurtimiz tinch bo‘lsin”, — deya yozib qoldirgan Saida Mirziyoyeva.
Sergeli tumanida kuchli portlash
Toshkent shahri Sergeli tumanidagi “Quruvchilar” dahasida Inter Logistics MCHJga qarashli omborxonada kuchli portlash va yong‘in 28-sentyabr kuni tunda sodir bo‘lgandi. Hodisa oqibatida jabrlanganlarning umumiy soni 163 kishini tashkil etdi, bir nafar o‘smir hodisa oqibatida vafot etdi. Mazkur holat yuzasidan IIV Tergov departamenti tomonidan Jinoyat kodeksining 259-moddasi (yong‘in xavfsizligi qoidalarini buzish) 2-qismi “a” va ”b” bandlari bilan jinoyat ishi qo‘zg‘atildi.
Sodir bo‘lgan favqulodda hodisani o‘rganish, ko‘rilgan talafotlarni bartaraf etish va jabrlanganlarga yordam ko‘rsatish bo‘yicha prezident topshirig‘iga ko‘ra hukumat komissiyasi tuzildi. Unga ko‘ra, komissiya favqulodda holat oqibatida zarar yetkazilgan har bir uy-joyni, jumladan, aholi xonadonlari, ko‘p qavatli uy-joylarning fasad qismlari, deraza va romlari hamda ta’mirtalab ahvolga kelib qolgan boshqa bino va inshootlarga yetkazilgan zararlarni bartaraf etish bo‘yicha moddiy yordam ko‘rsatish choralarini ko‘radi.