Sanitariya-epidemiologiya qo‘mitasi O‘zbekistonda kimlar grippga qarshi bepul emlanishi to‘g‘risida ma’lumot berdi.
Vazirlar Mahkamasining 2018-yil 23-iyuldagi “Gripp yuqtirish va uning og‘ir asoratlarini boshidan o‘tkazish xavfi yuqori bo‘lgan aholi o‘rtasida grippning oldini olish chora-tadbirlari to‘g‘risida”gi 567-son qaroriga asosan gripp yuqtirish va uning og‘ir asoratlarini boshidan o‘tkazish xavfi yuqori bo‘lgan:
- “Mehribonlik” uylari;
- qariyalar va nogironlar uchun “Saxovat” internat uylari,
- nogironlar hamda nogiron bolalar uchun “Muruvvat” internat uylari;
- bolalar shaharchalari;
- bolalar uylari;
- jismoniy yoki ruhiy rivojlanishida nuqsoni bo‘lgan bolalar uchun ixtisoslashtirilgan taʼlim muassasalarida (maktablar, maktab-internatlarda) yashayotgan shaxslar;
- davlat maktabgacha taʼlim tashkilotlari tarbiyachilari,
- umumtaʼlim maktablari o‘qituvchilari;
- tibbiyot xodimlari;
- davlat maktabgacha taʼlim tashkilotlari tarbiyalanuvchilariga grippga qarshi emlash uchun vaksinalar bepul, davlat budjeti hisobidan yetkazib beriladi.
Boshqa aholi vakillari o‘z hisobidan, tashkilot xodimlari o‘sha idora mablag‘lari hisobidan xususiy emlash markazlari orqali vaksina olishlari mumkin.
Avvalroq Sanitariya-epidemiologik osoyishtalik va jamoat salomatligi qo‘mitasi raisi o‘rinbosari Nurmat Otabekov mamalakatda ko‘kyo‘tal bo‘yicha xavotirlanishga asos yo‘qligini ma’lum qilgandi. Avgust boshlarida esa Otabekov O‘zbekistonda 12 million nafar bola milliy emlash kalendari asosida 13 turdagi boshqariluvchi yuqumli kasallikka qarshi emlangani to‘g‘risida ma’lumot bergan edi.
Izoh (0)