AQSHda talonchilik, odam o‘g‘irlash va jinsiy tajovuzda ayblanib, 28 yil panjara ortida o‘tirgan Xerardo Kabanillas aybsiz deb topildi. Bu haqda USA Today xabar berdi.
Los-Anjeles okrug prokurori Jorj Gaskon mahbusdan sud xatosi uchun kechirim so‘radi va u bilan sodir bo‘lgan voqeani “jiddiy adolatsizlik” deb atadi.
Yaqinda DNK testi Kabanillasning 1995-yilda kaliforniyalik juftlikka hujumga aloqador emasligini isbotladi. Project Innocence notijorat tashkiloti mahbus uchun yillar davomida kurashdi: natijada, Kabanillasning sudlanganligi butunlay bekor qilindi — u aybsiz deb topildi.
Xerardo Kabanillas hibsga olinganida atigi 18 yoshda edi. U avvaliga farzandining hayoti bilan jinoyatlarni qilmaganiga qasam ichgan, biroq kutilmaganda o‘z aybiga iqror bo‘lgan. Jabrlanuvchilar dastlab suratdan Kabanillasni ayblanuvchi deb topgan, biroq keyinroq bosim ostida qolganliklarini aytgan. Project Innocence’ning ta’kidlashicha, tergovchilar Kabanillasni agar shunday qilsa, shartli ravishda ozod qilinishiga va‘da berib, uni bunga ishontirgan.
Izoh (0)