Xonanda Rayhon G‘aniyevaning 14-oktabr kuni “Humo Arena”da o‘tkazilishi rejalashtirilgan konserti bekor qilingani ijtimoiy tarmoqlarda muhokamalarga sabab bo‘lmoqda. Xonanda tashkilotchilarni mas’uliyatsizlik va o‘z ishini bilmaslikda ayblamoqda. 



“Aziz muxlislarim, konsertimiz tashkilotchining o‘z ishini bilmasligi tufayli qoldirilishini ma’lum qilaman. Sotib olingan barcha chiptalarning puli qaytariladi. Konsert qachon va qayerda bo‘lishini e’lon qilamiz”, — deyiladi Rayhonning Instagram’da qoldirilgan videomurojaatida. 

Shundan so‘ng Rayhonning konserti tashkilotchisi —  Arfeum kompaniyasining Instagram’dagi sahifasida xonandaning aybloviga nisbatan bayonot e’lon qilindi. 

“Xonanda Rayxon G‘aniyevaning konsertini bekor qilish tashabbusi bilan kompaniyamiz chiqdi.
Bekor qilish sababi shundaki, konsert uchun kuchli reklama kampaniyasi (yuqoridagi loyihalardan ikki baravar kuchli) tashkil etilganiga qaramay, 3 yarim oylik reklama va konsertga 24 kun qolganida atigi 800 ga yaqin chipta sotilgan. Konsert zali esa 8500 tomoshabinga mo‘ljallangan.

Ushbu loyihaga ko‘p kuch, vaqt va resurslar sarflandi.
Lekin, afsuski, konsert uchun chiptalar sotuvi dinamikasi bizga konsertni bekor qilishdan boshqa chora qoldirmadi”, — deyiladi tashkilotchi kompaniya bayonotida.