Sobiq aktrisa Kamola Arslonova “Daryo”ning YouTube dagi kanaliga bergan intervyusida “Opa-singillar” serialiga taklif etilishi va qizini o‘zbek yigitiga turmushga berishni istamasligi haqida aytib o‘tdi.
— “Opa-singillar” serialida aktyorlar kasting asosida taklif etilgani haqida eshitganman. Rejissor Zamira Begimqulova yuzlab qizlar orasida rolga moslarini tanlab olgan ekan. Ammo men hech qanday kastingsiz rolga taklif etilganman. Zamira Begimqulovaning oldiga borganman va bir necha daqiqa suhbatlashganmiz. Bir necha kundan keyin rolga tasdiqlanganimni aytishgan. Keyin bilsam rejissor serialdagi opa-singillarni nafaqat mahoratiga, balki bir-biriga o‘xshash qiyofada ekaniga ham ahamiyat bergan ekan.
Serial suratga olinganiga 10 yildan oshdi, ammo haligacha odamlar yaxshi xotiralar bilan eslashadi. Hatto, uni qayta-qayta tomosha qilishayotgani haqida aytishadi. Hozirgi seriallarga qaraganda, ancha saviyali ekani haqida atishsa quvonib ketaman. Ayol boshi bilan katta jamoani boshqarish Zamira Begimqulovaga oson kechmagan. Qisqa vaqt ichida hammamiz bir oiladek bir-birimizga yaqin bo‘lib ketgandik. Rahmatli Gavhar Sharipova bilan ham syomka maydonchasida yaqin bo‘lib ketgandik. Hayotidan ko‘p nolirdi. Kimdir bunga e’tibor berar, kimlardir eshitishni ham istamasdi. Tabiatan dardkash inson bo‘lganim uchun Gavhar opaga e’tiborsiz emasdim. U bilan shunchalik yaqin bo‘lib ketgandikki, turmushga chiqib ketganimdan keyin ham xabarlashib turardik. Bir kuni turmush o‘rtog‘imga Gavhar opaning suratini ko‘rsatsam, “Hayotda qiynalgan ayol ekan”, dedi. Chunki insonning ichidagi dardi ko‘zlarida namoyon bo‘lar ekan. O‘shanda uni Turkiyaga chaqirib, o‘z o‘rnini topishiga ko‘maklashish haqida ham o‘ylagandik. Ammo yaxshilik qilaman, deb yomonlik qilib qo‘yishdan qo‘rqqanim uchun Gavhar opaga indamay qo‘ygandim. Ammo o‘limi haqidagi xabarni o‘qib, “Essiz o‘sha paytda nega Turkiyaga chaqirmadim. O‘limi haqida eshitganimda, balki bu yerda yashaganda bunday bo‘lmasmidi, deb o‘yladim. Ammo peshonaga bitilgan taqdirdan qochib qutilib bo‘lmaydi. Juda yaxshi, dilbar ayol edi, — deydi Kamola Arslonova.
Turk oilasiga kelin bo‘lgan sobiq aktrisa Instagram tarmog‘iga “Turkni kelin, o‘zbek yigitini esa kuyov qilmayman”, degan videosi ko‘plab muhokamalarga sabab bo‘lgandi. U nega bunday video joylaganini quyidagicha izohladi.
— Mehnatkashlik, odob-axloq borasida o‘zbek qizlariga teng keladigani yo‘q. Qaynonam ham bir necha videolarimda “Eng yaxshi kelinim sensan”, deb aytib o‘tgan. Faqatgina ovsinlarim ranjib qolishlarini istamay, ularni tarmoqqa joylamaganman. Nazarimda o‘zbek kelinlari eshitishni va “ho‘p bo‘ladi” deyishni bilishadi. Faqat o‘zbek qizlari o‘z qadrini bilishni va o‘zlarini sevishni o‘rganishlari kerak. Turkiyada yashasam ham baribir O‘zbekistonni yaxshi ko‘raman. Afsuski, oilamni tashlab tez-tez bu yerga kelish imkonim yo‘q. To‘rt yil deganda ota uyimga keloldim. Qizig‘i shundaki, farzandlarimga, xususan, qizimga O‘zbekiston begona, uning vatani Turkiya. U ham mendek Vatan sog‘inchi bilan yashashini istamayman. Onam “Yoshlikda tezroq farzandlaringni ko‘paytirib ol”, deb ko‘p aytadi. Yaqinda ham shu mavzu ko‘tarilganida “Ona sizning to‘rtta farzandingiz bor, ammo ularning hech bir yoningizda emas-ku”, deb aytib yuboribman. Taqdir taqozosi bilan men va singlim Turkiyada, opam Qozog‘istonda, ukam esa Rossiyada yashayapti. Katta hovlida esa onam yolg‘iz. To‘g‘ri yonida boshqa yaqinlarimiz bor, ammo ularning hech biri farzandlarning o‘rnini bosolmaydi. Ukam Rossiyada tibbiyot sohasi bo‘yicha o‘qiydi. Singlim ham men kabi turk yigiti bilan oila qurgan. Opam esa turmush o‘rtog‘ining ishi sabab, oilasi bilan Qozog‘istonda yashaydi. Hech birimiz xorijda yashashni orzu qilmaganmiz, nachora taqdirimizga shu yozilgan ekan, — deydi sobiq aktrisa Kamola Arslonova.
Izoh (0)