Bryus Uillisning rafiqasi aktyorning ahvoli og‘irlashayotgani haqida so‘zlab berdi

Yil boshida Gollivud aktyori Bryus Uillisda kam uchraydigan nevrologik kasallik aniqlangan edi. Aktyor demensiyaning noyob turidan aziyat chekmoqda. Bryusning rafiqasi yaqinda bergan intervyusida uning ahvolini og‘ir deb atadi.

“Insonning aqldan ozishi og‘ir ekan. Bu birinchi navbatda shu darddan aziyat chekayotgan inson uchun og‘ir. Shuningdek, bu vaziyatda uning oila a’zolariga ham oson emas”, — deydi Emma Xamming Today shousiga bergan intervyusida.

“Ayrimlar bu oilaviy kasallik ekanligini aytishadi. Bu haqiqatan ham to‘g‘ri”, — deya qo‘shimcha qiladi u.

Aktyorning rafiqasi uning ahvoli og‘irlashayotganini aytgan.

“Bu haqda gapirish qiyin. Miyaning peshona qismi insonning o‘zini anglashiga xizmat qiladi. Biz bilmaymiz. Ayrimlar o‘zini anglash hissini birinchi o‘rinda yo‘qotadi, ayrimlar esa bu hisni uzoqroq vaqt saqlab qoladi”, — deydi u.

Shuningdek, Emma bu haqda farzandlariga qanday aytishganini ham so‘zlab bergan.

“Biz uchun bolalarga ularning otalari qanday kasallikka chalinganini aytish muhim edi. Ularga bu qanday kasallik ekanligini tushuntirganmiz. Sababi agar siz tibbiy nuqtayi nazardan nima ro‘y berayotganini tushunsangiz, hammasi ravshanlashadi”, — deydi u.

Emma oilasidagi og‘ir vaziyatga qaramay, o‘zini qo‘lga olishga intilayotgani haqida ham gapirib o‘tgan.