Yurtimizda yoshlarni har tomonlama qo‘llab-quvvatlash, ayniqsa, ijtimoiy himoyaga muhtoj, turmush sharoiti og‘ir, kam taʼminlangan oilalarning farzandlari, chin yetim va nogironligi bo‘lgan yoshlarga manzilli ko‘maklashish bo‘yicha mutlaqo yangicha tizim yaratildi.
Har bir shaxs bilan individual va tizimli ravishda muntazam ish olib borishni tashkil qilish maqsadida moddiy yordam va ko‘makka muhtoj oilalar bo‘yicha — “temir daftar”, ijtimoiy, iqtisodiy, huquqiy, psixologik qo‘llab-quvvatlashga, bilim va kasb-hunar o‘rganishga ehtiyoji va ishtiyoqi bo‘lgan xotin-qizlar va yoshlar bo‘yicha tegishlicha “ayollar daftari” va “yoshlar daftari” hayotga tatbiq etildi.
Joriy yil boshidan “yoshlar daftari”ga kirish uchun 360 ming 436 ta onlayn murojaat kelib tushgan. Shundan ijtimoiy himoyaga muhtoj yoshlarning 340 ming 440 nafari “yoshlar daftari”ga kiritilib, 243 ming 591 nafariga amaliy yordam ko‘rsatildi.
Xususan, ishsiz va ijtimoiy himoyaga muhtoj 14 ming 187 nafar yoshlarga 36,2 milliard so‘mlik asbob-uskuna va mehnat qurollari ajratilib, o‘z hududlarida doimiy ish bilan taʼminlandi.
Ijtimoiy himoyaga muhtoj 40 mingdan ortiq yoshlarga 107,4 milliard so‘m miqdorda to‘lov-shartnoma xarajatlari qoplab berilib, taʼlimni davom ettirish imkoniyati yaratildi.
Davolanishga ehtiyoji mavjud 26 ming 519 nafar yoshlarga xorij va yurtimizdagi shifoxonalarda davolanishlari va zaruriy dori-darmonlar xaridi uchun 26,2 milliard so‘m sarflandi.
Kam taʼminlangan, nogiron va og‘ir hayotiy vaziyatdagi 18 ming 838 nafar yoshlarga 22,8 milliard so‘m miqdorda zaruriy moliyaviy ko‘mak ko‘rsatildi va qariyib 19 ming nafar yoshlarning ijtimoiy ahvoli yaxshilanishiga erishildi.
Zamonaviy kasblarni egallashga hamda xorijiy tillarni o‘rganishga qiziquvchi 3 ming 24 nafar yoshlarga 12,3 m milliard so‘m ajratildi. Ular veb-dasturlash, dizayn, modeling, veb ilovalar yaratuvchisi kabi kasblarga o‘qitildi.
Izoh (0)