Polsha prokuraturasi tergovchilari Ukraina chegarasidan yetti kilometr uzoqlikdagi Polshaning Prjevodov qishlog‘iga qulagan raketa Ukrainaning S-300 havo hujumidan mudofaa tizimi tomonidan uchirilgan degan xulosaga keldi. Bu haqda manbalarga tayanib, Rzeczpospolita xabar berdi.

Tergovchilar Ukraina mudofaa kuchlari “Sovet Ittifoqida ishlab chiqarilgan S-300 raketasini uchirgan” joyni aniqladi. Ular Rossiya qo‘shinlari Prjevodovdan uzoqda bo‘lgani uchun raketani rus harbiylari uchirgani ehtimolini rad etdi. Bundan tashqari, raketa Belarusdan uchirilishi ehtimoli tekshirilmadi.

Raketa Polsha hududiga 2022-yil 15-noyabrda Rossiya qo‘shinlarining Ukrainaga, xususan Lvov viloyatiga ommaviy hujumi chog‘ida tushgan. Oqibatda 59 va 60 yoshli ikki polshalik fermer raketa zarbasidan halok bo’ldi.

Rzeczpospolita manbalarining ta’kidlashicha, Ukraina havo hujumidan mudofaa kuchlari samaradorlikni oshirish uchun zenit-raketalarni juft-juft qilib ishga tushirgan — bir raketa nishonga tekkan, ikkinchisi esa uchishda davom etgan. Maʼlum bir balandlikda raketaning ichki mexanizmlari uni yo‘q qilishi kerak edi, biroq bu amalga oshmagan.

Polsha Bosh prokuraturasi matbuot kotibi Lukash Lapchinskiyning Rzeczpospolita’ga aytishicha, tergovchilar ish bo‘yicha xulosalar olgan, “lekin ularning mahfiyligini hisobga olib, mazmuni haqida xabar bermaydi”.

“Hozirgi bosqichda Polsha hududida tergov harakatlari tugatildi. Ukrainaga huquqiy yordam so‘rab murojaat qildik va javobni kutmoqdamiz”, — dedi departament vakili.

Ta’kidlanishicha, Ukraina Polsha tergovi bilan hamkorlik qilmagan va hech qanday material taqdim etmagan.