Rossiyaparast qarashlari bilan tanilgan sobiq bosh vazir Robert Fikoning partiyasi Slovakiyada bo‘lib o‘tadigan saylovlarda g‘alaba qozonsa, Rossiya tez orada Yevropadagi yangi ittifoqdoshiga ega bo‘ladi. Bu haqda Bloomberg xabar berdi.
Slovakiyaning eng uzoq vaqt xizmat qilgan bosh vaziri Fiko 2018-yilda iste’foga chiqishga majbur bo‘lgandi. U hozirda saylovoldi kampaniyasida urush oqibatlari haqidagi xavotirlardan faol foydalanmoqda.
“Fiko Ukrainaga harbiy yordamni to‘xtatishga va’da bergan, Slovakiya prezidentini Amerika agenti deb atagan va Ukrainaning NATOga a’zo bo‘lishiga qarshi. Hozircha Slovakiya odatda Kiyevni qo‘llab-quvvatlashda sobit bo‘lib kelgan, biroq so‘nggi so‘rovlar shuni ko‘rsatadiki, slovaklarning yarmidan ko‘pi urushda G‘arb yoki Ukrainani ayblaydi”, — deyiladi xabarda.
Slovakiyada saylovlar
Avvalroq OAV, agar sobiq hukumat rahbari Robert Fiko yangi bosh vazir bo‘lsa, Slovakiya Ukrainaga harbiy va siyosiy ko‘makni bekor qilishini ta’kidlagandi. U 30-sentabr kuni Slovakiyada bo‘lib o‘tishi kutilayotgan navbatdan tashqari parlament saylovlaridan keyin bu lavozimga asosiy da’vogar sifatida ko‘rilmoqda.
Shu bilan birga, Yevropa va Slovakiya regulyatorlari orasida saylovlar arafasida mahalliy ijtimoiy tarmoqlarda dezinformatsiya va kremlparast mafkura faol tarqalayotganidan xavotir kuchaymoqda. Yevropa Ittifoqi eng yirik ijtimoiy tarmoqlarni chet el tashviqotiga qarshi kurashmasa, katta miqdordagi jarimalar haqida ogohlantirgan.