Toshkent shahrining Yashnobod tumanidagi “To‘ytepa” mahallasi Sodiq Azimov ko‘chasida joylashgan 20-uyda yashovchi aholi vakillari tadbirkordan norozi bo‘lib, Bosh prokuratura oldida ko‘rinish berdi. Bosh prokuror bilan uchrashmoqchiligini aytgan murojaatchilar orasida yollangan kishilar borligi taxmin qilinmoqda. Bu haqda “Daryo”ga mahalla raisi Bahodir Rizayev ma’lum qildi. 

MFY raisiga ko‘ra, Bosh prokuratura binosi oldida to‘planganlardan uch-to‘rt nafarigina shu mahallada istiqomat qiladi.

Ularning uch-to‘rt nafari bizning mahallada yashovchi fuqarolar, qolgani shaxsan menga notanish fuqarolar. Boisi mahalla raisi sifatida mahallamizda kim istiqomat qilishini yaxshi bilaman va har bir fuqaroni taniyman, — deydi “To‘ytepa” MFY raisi Bahodir Rizayev. 

Raisning aytishicha, tuman hokimi Bosh prokuratura oldida to‘planib, muammo haqida shikoyat qilganlar bilan uchrashib, muammoni hal etishga kirishgan. Biroq, murojaatchilar orasida juda kamchilik mahalla aholisi ekaniga guvoh bo‘lgan. 

Aholining bu haqdagi shikoyati Oliy sudgacha chiqib, yer va avtoturargoh egaligi tadbirkorniki ekanligi isbotlagan. Ya’ni buni sud ham tasdiqlagan. Shunga qaramasdan aholi bolalar maydonchasi buzilib, tadbirkor yerni olib qo‘yishidan, shuncha yillar davomida foydalanib kelingan avtoturargoh olib qo‘yilishidan norozi bo‘lmoqda, — deydi MFY raisi muammo nimadan chiqqaniga aniqlik kiritgan rais. 

Tadbirkor tomon vakili Ulug‘bek Mirzayevning OAV vakillariga ma’lumot berishicha, Sodiq Azimov ko‘chasidagi 20-uy 2009-yil tadbirkor tomonidan qurilgan.

Aslida bu joy tadbirkor Obidxon aka Muhammedovniki hisoblanadi. U kishi bu yerni 2005-yilda auksiondan sotib olib, ruxsatnomalarni rasmiylashtirgan holda ko‘p qavatli uy qurilishini boshlagan. Uy 2009-yilda 48 ta xonadondan iborat shaklda foydalanishga topshirilgan. Uyning yerosti qismida 42 ta avtomobilga mo‘ljallanib, avtoturargoh ham qurilgan. Biroq o‘sha yili hokimlik qarori bilan faqat turar joyga nisbatan egalik huquqi e’tirof etilgan. Noturar joylar — avtoturargoh, qorovulxona va omborxonalarga esa egalik huquqi berilmay qolib ketgan. 2018-yilda hokimlikka shu kamchilikni tuzatish bo‘yicha murojaat qilinib, 2019-yilda noturar joylar qaytadan foydalanishga topshirilib, ularga mulk huquqi berildi, — deydi tadbirkorning ishonchli vakili, advokat Ulug‘bek Mirzayev. 

Raisning jurnalistlarga tushuntirish berishicha, aholining kam qismi 20-uy oldida joylashgan bolalar maydonchasi hamda ko‘p qavatli uyning yerosti qismidan joy olgan avtoturargoh qonuniy egasiga o‘tib ketishidan norozi. Aytilishicha, tadbirkor-quruvchi aholi unga tegishli yerga o‘zboshimchalik bilan bolalar maydonchasi qurib olgani, yillar davomida unga tegishli avtoturargohdan bepul foydalanib kelishiga qaramasdan, endilikda bularni o‘ziniki qilishga urinayotganidan ranjigan.

Hozirgi siyosatimizni o‘zingiz ham yaxshi bilasiz, odatda bolalar maydonchasi bo‘lgan joylar buzilmasin deyiladi. Shuni yaxshi bilgan aholi 2005-yilda loyihasi tuzilgan yer-maydoniga 2019—2020-yillarda ko‘p qavatli uy qurishimizni bilgach, 2021-yilda o‘zboshimchalik bilan bolalar maydonchasini qurib olgan. O‘sha paytda tadbirkor bu yer unga tegishli ekanini aytib, aholini o‘zboshimchalik qilmaslikka chaqirgan. Lekin buning foydasi bo‘lmagan. Bugungi kunga kelib esa aholi vakillari tadbirkor bolalar maydonchasini buzib tashlamoqda degan gapni aytishmoqda. Aslida bu yer tadbirkorga tegishli yer bo‘lgan, — deydi ishonchli vakil.

Ulug‘bek Mirzayevning qo‘shimcha qilishicha, aholi tadbirkorga tegishli yerda bolalar uchun o‘yingoh qurmoqchiligini aytib, hokimlikka murojaat qilgan. Hokimlik so‘ralgan paytda buzib tashlash sharti bilan, yengil konstruksiyali bolalar maydonchasi qurilishiga qarshiligimiz yo‘q degan mazmunda javob xati bergan.

Aholi hokimiyatning aynan shu javob xatini bizga bolalar maydonchasi qurilishiga hokimiyat ruxsat bergan deb olib yuribdi. Vaholanki, hokimlik birinchi talab qilingan paytdayoq buzib tashlash sharti bilan yengil konstruksiyali bolalar maydonchasi qurilishiga qarshiligimiz yo‘q degan, — deydi u.

Jurnalistlar bilan muloqotda bo‘lgan aholi vakillaridan biri V.Balayan o‘ziga tegishli xonadonni 2009-yil sotib olganini, uyni sotib olayotganda unga “bir xonadonga bitta avtoturargoh” degan va’da bilan sotishganini, biroq uyning oldi-sotdi shartnomasida bu aks etmaganini aytmoqda. 

Hujjatlarga yaxshi tushunishini aytayotgan aholi vakiliga ko‘ra, u uyning oldi-sotdi shartnomasida avtoturargoh haqida hech narsa yozilmaganini aytib, shartnoma tuzuvchilardan bu haqda so‘raganini, ammo Abror ismli yuristidan ham tayinli javob ololmaganini ta’kidlamoqda. U mazkur muammoni ko‘rib chiqqan sudlarni adolatsizlikda ayblamoqda.

V.Balayan hududdagi uy va unga tegishliligi aytilayotgan avtoturargoh egasi ekanini ta’kidlasa-da, buni isbotlovchi hujjatlar taqdim etolmadi. Yerning asl egasi ekanini ta’kidlayotgan tadbirkor vakili Ulug‘bek Mirzayev esa yer 2005-yil sotib olinganini tasdiqlovchi hujjatdan tortib, yerga qurilish qilishga ruxsat beruvchi hujjat, qurilgan uyning egalik huquqini beruvchi kadastr hujjati va avtoturargohdan bepul foydalanib kelinganini tasdiqlovchi aktlarni ham taqdim qildi.

Maqolada bejiz “Kim haq? Tadbirkormi yoki aholi?” degan savolni o‘rtaga tashlamadik. Keltirilgan ma’lumotlar va dalillar orqali zukko o‘quvchi maqola so‘ngida savolga javob berishga qiynalmasa kerak.

“Daryo” har ikki tomonga qo‘shimcha ma’lumotlar taqdim etish uchun minbar berishga tayyorligini bildiradi va lozim topilsa, albatta mavzuga qaytadi.