2030-yilga borib O‘zbekiston yalpi ichki mahsulot hajmini ikki baravar oshirmoqchi. Buning uchun mamlakat rasmiylari AQSH, Rossiya va Xitoy manfaatlarini muvozanatlashtirishi kerak, deb yozmoqda Bloomberg.
Tobora parchalanib borayotgan bugungi global iqtisodiyotda O‘zbekiston uchun bu oson ish emas, ta’kidladi nashr.
“Bugungi geosiyosiy vaziyat shuni ko‘rsatmoqdaki, faqat bitta davlatga tayanib bo‘lmaydi, chunki bu xavfsiz emas”, — dedi O‘zbekiston bosh vaziri o‘rinbosari Jamshid Xo‘jayev. “Har bir mamlakat diversifikatsiya izlaydi”.
“Xitoy bizning eng yirik savdo va sarmoyaviy hamkorlarimizdan biri”, — dedi Xo‘jayev shu oy Vashingtonda bo‘lib o‘tgan AQSH—O‘zbekiston biznes konferensiyasi chog‘ida bergan intervyusida. “Biz buni yashirmaymiz, chunki ular qayta tiklanadigan manbalar va yashil energiyaga juda o‘ch. Ularning yaxshi texnologiyalari, yirik kompaniyalari bor, qolaversa, ular biz bilan ishlashni xohlaydi”.
Shu bilan birga, Rossiya O‘zbekistonning eng yirik savdo sheriklaridan biri bo‘lib qolmoqda. Moskva bilan tarixiy aloqalar bu munosabatlarni mustahkamlagan. Bundan tashqari, ko‘plab o‘zbekistonliklar Rossiyada ishlab, oilalariga pul jo‘natadi, deb qayd etdi Bloomberg.
Xo‘jayev bu aloqalarni “yaxshi imkoniyat” deb ataydi, chunki o‘zbeklarning ko‘pchiligi rus tilida gaplasha oladi. U, shuningdek, rasmiylar ushbu bozorni diversifikatsiya qilish uchun Yevropaning boshqa mamlakatlari bilan ishlayotganini aytdi.
Qayta tiklanadigan energiyadan tashqari, Xitoy O‘zbekistonga infratuzilmani rivojlantirishda ham katta yordam ko‘rsatmoqda. Bu davom etadi, dedi Xo‘jayev. Ammo mamlakat AQSHdan investitsiyalarni jalb qilmoqchi, ayniqsa, AQSH kompaniyalari ustunlik qiladigan rivojlanayotgan yuqori texnologiyali sektorga.
“Bizda bozor iqtisodiyoti mavjud va biz barcha investorlarimizga bir xil shart-sharoitlarni yaratishga harakat qilmoqdamiz”, — dedi u. “Agar sizda eng yaxshi variant mavjud bo‘lsa, unga intilasiz”.
Rossiyaning Ukrainaga bostirib kirishi ortidan paydo bo‘lgan qiyinchiliklardan biri AQSH va Yevropadan Rossiyaga taqiqlangan tovarlarni tashishni to‘xtatishga urinish bo‘lmoqda. O‘zbekiston bu tovarlar o‘z chegaralaridan olib o‘tilmasligi uchun AQSH Moliya vazirligi bilan hamkorlik qilmoqda, dedi elchi Furqat Sidiqov.
Xo‘jayevning aytishicha, O‘zbekiston boshqa davlatlar iqtisodiyotning energiya va oziq-ovqat ta’minoti kabi nozik tarmoqlariga kiritayotgan sarmoyalarni diversifikatsiya qilishga harakat qilmoqda, biroq infratuzilma kabi boshqa sohalarga kelganda, rasmiylar “xalq uchun eng yaxshi deb hisoblagan ishni qiladi”.
“Biz kimga va qayerga sarmoya kiritishini buyuradigan darajada boy emasmiz”, — dedi u.
Izoh (0)