Toshkent shahar IIBB xorijdan turib o‘zini diniy ulamo sifatida ko‘rsatib, radikal g‘oyalarni tarqatib kelayotgan fuqarolardan ogoh bo‘lishga chaqirdi.

Ma’lum qilinishicha, shunday fuqarolardan biri 1985-yilda Namangan viloyatida tug‘ilgan Sh.D. bo‘lib, Suriyadagi “Imom al-Buxoriy katibasi” terrorchilik tashkilotining mediamarkazi rahbaridir.

2012-yil mart oyida u ishlash maqsadida Rossiyaga borgan. U yerda xalqaro terrorchilik tashkiloti rahnamolarining salbiy ta’siri ostida jihodchilar diniy ekstremistik oqimning Moskva jamoasiga qo‘shilib, jamoa yetakchilarining ko‘rsatmasiga ko‘ra 2014-yil fevral oyida Suriyaga o‘tib, jangovar harakatlarda ishtirok etgan.

Sh.D. Facebook’da Alixonto‘ra Shokirjon o‘g‘li profilini yuritib keladi. Ma’lumki, olim va ulamo Alixonto‘ra Sog‘uniy “Devoni Sog‘uniy”, “Tarixi Muhammadiy”, “Shifo ul-ilal” kabi asarlar muallifidir. Mazkur ulamo nomidan foydalanib, internet tarmog‘ida o‘zini O‘zbekistonning yirik ulamosi sifatida ko‘rsatib, bir necha fuqarolarni xalqaro terrorchilik tashkiloti safiga qo‘shilishga da’vat qilib kelgan Sh.D. aslida umuman diniy ta’lim olmagan shaxs hisoblanadi.

Uning internetdagi profili ham O‘zbekiston Oliy sudi tomonidan ekstremizm va terrorizm g‘oyalari bilan yo‘g‘rilgan deb topilgan va O‘zbekiston hududiga olib kirish, tayyorlash, tarqatish va namoyish etish taqiqlangan materiallar ro‘yxatiga kiritilgan. 

Sh.D.ga nisbatan O‘zbekiston Jinoyat kodeksining 155-2-moddasi (terrorchilik faoliyatini amalga oshirish maqsadida o‘quvdan o‘tish, chiqish yoki harakatlanish), 244-2-moddasi (diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) va 223-moddasi (qonunga xilof ravishda chet elga chiqish) bilan jinoyat ishi qo‘zg‘atilib, qidiruv e’lon qilingan.