“Opa-singillar” serialidagi Shahnoza roli bilan tomoshabinlarga yaxshi tanish bo‘lgan aktrisa Kamola Arslonova o‘n yildan buyon Turkiyada yashaydi. Turk yigiti bilan oila qurgan sobiq aktrisa sentyabrda farzandlari bilan birga Toshkentga keldi. “Daryo” muxbiri Nargizaxon Murodova uni intervyuga taklif etib, tomoshabinlarni qiziqtirgan ko‘plab savollarga javob oldi. Xususan, Kamola Arslonova ayni kunlarda nimalar bilan bandligi, san’atdan ketishining asosiy sabablari haqida ochiqchasiga gapirdi.
— Ayni kunda ikki farzandimning tarbiyasi bilan bandman. Turmush o‘rtog‘im ishlashimga yoki ijod qilishimga ruxsat bergan taqdirida ham hozir bunga rozi bo‘lmagan bo‘lardim. Chunki bor e’tiborimni bolalarimga qaratganman.
San’at bolaligimdagi orzum bo‘lib, hamisha sahna sari intilish bo‘lgan. Amakim Hoshim Arslonov aktyor bo‘lsa-da, san’at oliygohi borligini bilmaganman. Onamning tavsiyasiga ko‘ra, tibbiyot institutiga hujjat topshirganman. Ammo fikr-u xayolim baribir san’atda bo‘lgan. Tavakkal qilishdan qo‘rqmaydigan inson bo‘lganim uchun ikkinchi kursda tibbiyot institutida o‘qishdan voz kechib, san’at oliygohiga hujjat topshirganman. Aytmoqchimanki, san’atni pul yoki obro‘ uchun emas, dildan xohlaganim uchun tanlaganman. Ammo ona bo‘lgandan keyin tavakkal qilolmas ekansiz. Ayniqsa, to‘rt yil farzandli bo‘lolmay, tushkunlikka tushgan damlarimni eslasam, ko‘zimga bolalarimdan boshqa hech narsa ko‘rinmaydi, — deydi Kamola Arslonova.
Sobiq aktrisa ijodda ko‘p bor aldangani va so‘nggi zarbalardan so‘ng taqiqlarga ham uchragani haqida aytib o‘tdi.
— Shou-biznesda pul bilan aldash holatlari juda ko‘p bo‘ladi. Ammo ularga e’tibor berib, san’atdan ko‘nglim sovib qolmagan. Shukr qilamanki, birovdan qarzim yo‘q, men bilan ishlaganlarning hammasi xizmat haqlarini olishgan. Aktrisa edim, shu bilan birga qo‘shiq ham kuylardim. Shunday kunlar ham bo‘lganki, prodyuser bilan kelishuvni bekor qilganimdan keyin menga qandaydir taqiqlar qo‘yishgan. “Unga rol bermang, hamkorlik qilmang”, shunga o‘xshash gap-so‘zlar qulog‘imga chalingan. Ammo osongina taslim bo‘ladigan qiz emasdim. Taqiqlar bo‘lganida ham ikkita filmda asosiy rollardan birini ijro etganman, qo‘shiqlar yaratganman.
Ijod o‘z yo‘liga, ammo ayol kishi uchun eng muhimi oila ekanligini bilganim uchun turmush o‘rtog‘imning oila qurish haqidagi qarorini rad etmaganman. Turk yigitiga turmushga chiqish xayolimga ham kelmagan, sayohatga kelgan paytda uchratib qolganman va yuragim jiz etgan. Ayrimlar o‘ylagandek, turmush o‘rtog‘imning yoshi katta emas. Tanishgan paytimizda boy-badavlat inson ham bo‘lmagan. Ba’zilar o‘ylagandek boylik yoki mansab uchun u inson bilan oila qurmaganman. Hatto yashaydigan uyimiz o‘ziniki yoki ota-onasiniki ekanligiga ham qiziqmaganman. Meni faqat u inson va oilaga bo‘lgan munosabati qiziqtirgan xolos. Hozirgi kunda faqat shukr qilaman, o‘zimga yaxshi yor, farzandlarimga mehribon ota tanlay olganman, — deydi Kamola Arslonova.
Eslatib o‘tamiz, Kamola Arslonova Diyora taxallusi bilan ijod qilgan. U “Opa-singillar” serialidan tashqari, “Super qaynona” filmida Farrux Soipov bilan partnyor sifatida suratga tushgan. U bir nechta qo‘shiqlar ijro etib, klip ham suratga olgandi.
Suhbatni quyida to‘liq tomosha qilishingiz mumkin:
Izoh (0)