Ijtimoiy tarmoqlarda maktab doskasini urib sindirgan o‘quvchi videosi keng tarqalib, qizg‘in muhokamalarga sabab bo‘lgandi. Maktabgacha va maktab ta’limi vazirligi axborot xizmati masu’li Laylo Rustamovaning ma’lum qilishicha, o‘sha o‘quvchi topilgan.
Aniqlanishicha, videodagi holat Samarqand viloyatining Payariq tumanidagi 19-maktabning 11-sinf o‘quvchisi tomonidan sodir etilgan.
Voqea eski bo‘lib, 2022-yil o‘sha o‘quvchi 10-sinfda tahsil olgan paytda sodir etilgan. Video TikTok ga joriy yilning 23-sentabr kuni joylagan.
Samarqand viloyati Maktabgacha va maktab ta’limi boshqarmasi bergan ma’lumotlarga ko‘ra, holat o‘rganilganda o‘quvchi tomonidan maktab mulkiga keltirilgan zarar uning ota-onasi tomonidan qoplab berilgan. Payariq tuman IIB tomonidan o‘quvchining otasiga nisbatan Ma’muriy javobgarlik to‘g‘risidagi kodeksning 47-moddasi 1-qismiga asosan ma’muriy jazo qo‘llangan.
Bu narsa o‘quvchiga ta’sir qilmagan, ta’sir qilgan bo‘lganida edi, bir yil oldin qilgan qilmishini ko‘z-ko‘z qilib, bugun Tik-Tok’ga chiqarmagan bo‘lardi. Afsuski, ayrim o‘quvchilarning mana shunday xatti-harakatlari barcha yoshlar nomiga isnod keltiradi. Bolani “tarbiyalaganlar” nomiga shu bir necha kun ichida millionlab la’natlar yog‘ildi. Farzand tarbiyasi bebaho ne’mat ekanligini unutmasligimiz lozim. O‘zimiz tarbiyani qo‘lga olmasak, ularni yo‘rig‘iga soladiganlar juda ko‘p, — deydi Laylo Rustamova.
Izoh (0)