Qashqadaryo viloyati hokimi Murodjon Azimov taklifiga ko‘ra, Xitoy Xalq Respublikasi Jiansu provinsiyasi gubernatori Syuy Kunlin boshchiligidagi 53 nafar tadbirkor Qashqadaryo viloyatida bo‘lib, viloyatda faoliyat yurituvchi tadbirkorlar hamda hamkorlar bilan kelishuv bitimlarini imzoladi. Mazkur tashrif davomidagi kelishuvlar natijasida xitoyliklar viloyatga 350 million dollardan ortiq sarmoya kiritadigan bo‘ldi. 

Tashrif davomida ikki tomonlama uchrashuv “O‘zbekiston (Qashqadaryo) – Xitoy (Jiansu)” biznes forumi va sanoat mahsulotlari ko‘rgazmasi o‘tkazildi. Unda Xitoy tomoni mazkur tashrifdan davlat rahbarlarining 2023-yil 19-may kuni Sian shahridagi kelishuvlari ijrosini ta’minlash ko‘zlanganini ta’kidladi. Shuningdek, 22-iyul kuni Chanjou shahrida ikki hudud ma’muriyatlari va tadbirkorlari o‘rtasidagi uchrashuv va biznes-forumning amaliy davomi ekani e’tirof etildi, — deydi bu haqda ma’lumot bergan Ahror Sodiqov. 

Ta’kidlanishicha, uchrashuv davomida Xitoy tomon “Bir makon, bir yo‘l” tashabbusi doirasida Qashqadaryo viloyatida “To‘qimachilik sanoat zonasi” va “O‘zbek-Xitoy” sanoat parkini qurish imkoniyatlarini o‘rgangan. Jiansuning yirik kompaniyalari ishtirokida “yashil energetika” yo‘nalishida qo‘shma loyihalar amalga oshirish masalasini muhokama qilgan. 

Shuningdek, uchrashuvda viloyatda neft-gaz va sun’iy tola ishlab chiqarish yo‘nalishida sarmoyaviy va kooperatsion aloqalarni o‘rnatishga, viloyatda yetishtiriladigan dukakli don ekinlarini (mosh, loviya va no‘xat) Jiansuga eksport qilishga, Shahrisabz tumani va shahridagi sanoat zonalarida Jiansu kompaniyalari ishtirokidagi qo‘shma loyihalarni amalga oshirish hisobidan, kambag‘allikni qisqartirishga kelishib olindi, — deydi hokimlik mas’uli.

Qo‘shimcha qilinishicha, Xitoy tomon viloyatning Mirishkor tumanidagi “Sechanko‘l” va “Achinko‘l” ko‘llarida Jiansu tajribasi asosida baliq va qisqichbaqasimonlar oilasiga mansub dengiz mahsulotlarini yetishtirish niyati borligini ma’lum qilgan. Muborak, Koson, Ko‘kdala va Qamashi tumanlarida mahalliy tadbirkorlar bilan hamkorlikda ipakchilik klasterlari tashkil qilishga kelishgan.

Tadbir so‘ngida Qashqadaryo viloyati bilan Jiansu provinsiyasi o‘rtasida do‘stona aloqalarni o‘rnatish to‘g‘risida ahdlashuv memorandumi imzolandi, — deydi Murodjon Azimovning matbuot kotibi Ahror Sodiqov.  

Aniqlashtirilishicha, uchrashuv natijasida viloyatga umumiy qiymati 350 million dollardan ziyod 20 ta, jumladan, qiymati 338 million dollarlik 18 ta sarmoyaviy kelishuvlarga erishilgan. 

Kelishuvlarga ko‘ra, xitoylik tadbirkorlar viloyatning Muborak, Koson, Ko‘kdala va Qamashi tumanlarida ipakchilik klasterlari tashkil etadi. Qarshi shahrida qishloq xo‘jaligi texnikalarini (80 ot kuchli traktorlar va agregatlar) yig‘ish yo‘lga qo‘yiladi. Elektrotexnika (sensor) mahsulotlarni ishlab chiqarish boshlanadi. Kitob tumanida har xil turdagi polistirin mahsulotlari ishlab chiqarish, Mirishkor tumanida transformator va ehtiyot qismlarini ishlab chiqarish yo‘lga qo‘yiladi. Yakkabog‘ tumanida esa kafel mahsulotlari ishlab chiqarish ishlari amalga oshiriladi, — deydi Sodiqov.