Ukraina Rossiyaning maxsus harbiy samolyotlar, rahbarlar uchun VIP transportlar saqlanadigan o‘ta “nozik” joyiga hujum qildi. Bu haqda Buyuk Britaniya Mudofaa vazirligi o‘zining so‘nggi razvedka hisobotida ma’lum qildi.
Ma’lum qilinishicha, gap 18-sentabr kuni Moskva viloyatidagi Chkalovskiy aerodromiga berilgan zarba haqida ketmoqda. Unda ikki nomaʼlum diversant kamida ikkita rus samolyotini yo‘q qilgan.
Britaniya razvedkasi so‘nggi to‘rt kun ichida Ukraina qo‘shinlari Rossiyaning orqa qismiga intensiv hujumlar berganini yozmoqda. Jumladan, Qrim, Krasnodar o‘lkasi va Moskvadagi Rossiyaning logistika obyektlari, aviabazalari va qo‘mondonlik punktlarida portlashlar sodir bo‘lgan.
“Ehtimol, Rossiya Qora dengiz floti yana kuchli nishonga aylangan. Biroq Moskva yaqinidagi Chkalovskiy aviabazasidagi portlashlar Rossiya rahbarlari uchun eng katta strategik muammo bo‘lishi mumkin”, — deyiladi xabarda.
Britaniya Mudofaa vazirligining ta’kidlashicha, Chkalovskiy aviabazasidagi COOT (Il-20) maxsus maqsadli samolyotiga yetkazilishi mumkin bo‘lgan zarar haqidagi xabar, uning razvedka qobiliyati va narxini hisobga olgan holda aktualdir.
Mudofaa vazirligi Rossiyaning Ukrainaga bergan so‘nggi yirik zarbalari Qrim va Rossiyadagi maxsus operatsiyalar muvaffaqiyati bilan bog‘liq, deb hisoblaydi.
“Bu Rossiya va Qrimdagi voqealarga reaksiya bo‘lishi mumkin. Frontdagi vaziyat nisbatan statik bo‘lgani uchun har bir tomon o‘z dushmanining strategik chuqurligiga zarba berish orqali o‘z manfaatlarini ko‘zlamoqda”, — deya xulosa qiladi tahlilchilar.
Izoh (0)