Bishkekda barcha bekatlarda konditsioner va Wi-Fi o‘rnatiladi. Bu haqda Bishkek meri Emilbek Abdiqodirov ma’lum qildi.

Amaldorga ko‘ra, yaqin vaqt ichida shahardagi barcha avtobus bekatlari yagona standart bo‘yicha o‘zgartiriladi. Ayni paytda avtobus bekatlarini rekonstruksiya qilish loyihasini amalga oshirilmoqda. Birinchi bosqichda 25 ta bekat quriladi.

Hozirda 4 ta yangi ta’mirdagi bekat faoliyat ko‘rsatmoqda. Yaqin kunlarda yana 11 tasi quriladi. Yangi bekatlar yozda salqinlikni, qishda esa issiqlikni ta’minlaydi. Ular videokuzatuv tizimlari bilan jihozlanadi.

Tadbirkorlar besh yilga bekatlarni ijaraga olishi va u yerda markali savdo avtomatlari va boshqa jihozlarni o‘rnatishi mumkin. Biroq bekatlarda spirtli ichimliklar, sigaretalar va tez buziladigan oziq-ovqat mahsulotlarini sotish taqiqlanadi.

Rekonstruksiyaning birinchi bosqichida Manas/Aytmatov, Chuy prospektlari hamda Abdrahmonov/Baytik Baatir ko‘chasidagi bekatlarni yangilash rejalashtirilgan.