Kampirobod suv omboridan Farg‘ona shahriga toza ichimlik suvi tortiladi. Bu haqda viloyat hokimligi matbuot xizmati xabar berdi.

Ma’lum qilinishicha, Hayrullo Bozorov boshchiligidagi Farg‘ona viloyati delegatsiyasining Xitoyga tashrifi davomida viloyatdagi ijtimoiy muassasalarni qurish yoki kapital rekonstruksiya qilish hamda Kampirobod suv omboridan Farg‘ona shahriga toza ichimlik suvi tortish loyihalari borasida Xitoyning Sinomach (China National Machinery Industry Corporation) xoldingi bilan dastlabki kelishuvlarga erishildi.

Ushbu loyihalarga Xitoy moliya muassasalari tomonidan kamida 20 yil muddatga 300 million dollargacha miqdorda yoki ekvalentida dollarda yillik 3 foizgacha bo‘lgan kredit ajratilishi ko‘zda tutilgan.

Kampirobod suv ombori O‘zbekistonning Andijon viloyati va Qirg‘izistonning O‘sh va Jalolobod viloyatlari chegarasida joylashgan. SSSR parchalanganidan keyin suv ombori mustaqil Qirg‘iziston va O‘zbekiston o‘rtasidagi hududiy nizo markazida bo‘lgan. 2023-yil 30-noyabr kuni 30 yillik muammo hal bo‘ldi: Shavkat Mirziyoyev  O‘zbekiston bilan Qirg‘iziston o‘rtasidagi davlat chegarasining alohida uchastkalari to‘g‘risidagi shartnoma hamda Andijon (Kampirobod) suv omborining suv resurslarini birgalikda boshqarish to‘g‘risidagi bitimni ratifikatsiya qilishga oid qonunlarni imzoladi.

Unga ko‘ra, O‘zbekistonga 4957 gektardagi Andijon suv ombori hududi hamda to‘g‘onga xizmat ko‘rsatish va uni muhofaza qilish uchun qo‘shimcha 19,5 gektar yer maydoni o‘tkazildi, Qirg‘izistonga esa kompensatsiya tarzida 1019 gektar yaylov yerlari berildi.