Namangan viloyatining Chust tumanidagi bolalar bog‘chalarida tarbiyalanuvchilarning doridan zaharlangani aytilgan xabar tarqalgandi. Viloyat Maktabgacha va maktab ta’limi boshqarmasi vaziyatga aniqlik kiritdi.
Haqiqatdan ham 21-sentabr kunining ikkinchi yarmida Chust tumani Maktabgacha va maktab ta’limi bo‘limiga qarashli 23-sonli DMTTning ayrim tarbiyalanuvchilari orasida tana haroratining ko‘tarilishi, qusish, qorin og‘rig‘i alomatlari kuzatilgan. Bo‘lim mutasaddilari voqea joyiga yetib borishgan va dastlabki shikoyat bo‘yicha 5 nafar bola shifoxonaga olib kelingan.
Keyinchalik shikoyat qiluvchilar soni ortib borgan. Shunga ko‘ra, 23-MTTdan 35 nafar, 51-MTTdan 20 nafar, 18-MTTdan 5 nafar, 36-MTTdan 3 nafar, 7-o‘rta ta’lim maktabidan 1 nafar, 43-MTTdan 1 nafar, 21-o‘rta ta’lim maktabidan 1 nafar, 30-MTT 2 nafar 35-MTTdan 1 nafar 34-MTTdan 1 nafar, oilaviy MTTdan 1 nafar — jami 71 nafar bolaning sog‘ligidan shikoyatlar qayd etilgan va ular tezkorlik bilan shifoxonaga yotqizilgan, — deyiladi boshqarma axborotida.
Ta’kidlanishicha, ko‘rilgan tezkor chora-tadbirlar, xususan, tez tibbiy yordam tufayli bolalarning 9 nafari sog‘lomlashtirilib, yashash uyiga qaytarilgan.
Qolgan bolalarning ham ahvoli mo‘tadil, ular shifokorlar nazoratiga olingan. Shuni alohida ta’kidlash lozimki, shifoxonaga yotqizilgan bolalarning hech birida reanimasion, ya’ni og‘ir holat yo‘q. Voqeaning kelib chiqish tafsilotlari tegishli mutaxassislar tomonidan o‘rganilmoqda. Bu haqda qo‘shimcha axborot beriladi, — deyiladi mas’ullar izohida.
Bosh prokuraturaning mazkur holatga qo‘shimcha qilishicha, voyaga yetmagan bolalar zaharlanishi yuzasidan prokuratura tomonidan tergovga qadar tekshirish harakatlari olib borilmoqda.
Tekshirish davomida voyaga yetmagan bolalarning zaharlanishi sabablari aniqlanadi va bu haqida qo‘shimcha ravishda xabar qilinadi. Voyaga yetmagan bolalar nimadan zaharlanganligi hali noma’lum bo‘lganligi sababli jamoatchilikdan noto‘g‘ri va turli taxminlarga asoslangan xabarlarni tarqatmasliklarni so‘rab qolamiz. Tekshirish jarayoni nazoratga olingan. Chust tumanida favqulodda holat e’lon qilinganligi haqidagi xabarlar haqiqatga to‘g‘ri kelmaydi, — deyiladi Bosh prokuratura axborotida.