Ijtimoiy tarmoq sahifalarida poytaxt umumtaʼlim maktablarida sinf fondi va boshqa tadbirlar uchun ota-onalardan pul yig‘ilayotgani haqida xabarlar tarqaldi. Maktabgacha va maktab taʼlimi boshqarmasi xabarlar yuzasidan ota-onalarga murojaat qildi.
Unga ko‘ra, bu kabi xabarlar isbotsiz va maʼlumot soha xodimlarining faoliyatiga xalaqit qilib, ortiqcha ovoragarchiliklarga yo‘l qo‘ymoqda. Shu sababli boshqarma ota-onalardan yolg‘on xabarlar tarqatmaslikni so‘ragan.
“Bugun mamlakatimiz maktabgacha va maktab taʼlimi tizimida keng ko‘lamda islohotlar amalga oshirilmoqda. Siz sohani rivojlantirish, taʼlim sifati va samaradorligini oshirishga rostan ko‘maklashmoqchimisiz?! Biz bundan juda xursand bo‘lamiz. Faqat sizlardan iltimos, joylardagi holat yuzasidan aniq dalil va isbotlari bilan murojaat qilishingiz so‘raladi xolos. Bu kabi isbotsiz maʼlumot soha xodimlarining faoliyatiga xalaqit qilib, ortiqcha ovoragarchiliklarga yo‘l qo‘ymoqda.
Har bir taʼlim muassasasi o‘z maʼmuriyatiga ega, har bir sinfning rahbari, maktab direktorining o‘quv ishlari, maʼnaviy-maʼrifiy masalalar bo‘yicha o‘rinbosarlari faoliyat ko‘rsatadi. Shunday ekan, hech bir asosga ega bo‘lmagan yoki sizni o‘ylantirayotgan masala yuzasidan avvalo o‘z farzandingiz taʼlim olayotgan dargoh mutasaddilariga murojaat qilsangiz, olam guliston. Keyingi paytlarda yuqoridagi kabi asossiz va noto‘g‘ri maʼlumotlarning ijtimoiy tarmoq sahifalarida ketma-ket chop etilayotganligi kishini o‘yga toldiradi, albatta.
O‘z navbatida shuni unutmaslik kerakki, yuqoridagi kabi asossiz va yolg‘on maʼlumotlarni tarqatgan shaxsga nisbatan qonunchiligimizda tegishli javobgarliklar belgilab qo‘yilgan.
Agar rostan ham taʼlim muassasasida farzandingizga nisbatan nohaqlik, biror adolatsizlik yuz bergan bo‘lsa yoki korrupsiya holatiga duch kelsangiz, Toshkent shahar maktabgacha va maktab taʼlimi boshqarmasi ishonch telefoni +998 71 237 08 93 raqamiga qo‘ng‘iroq qiling”, deyiladi murojaatda.
Izoh (0)