O‘zbekiston bozoriga kirib kelishi kutilayotgan iPhone 15 “Malika” bozorida sotila boshladi.

“Daryo” muxbiri oddiy xaridor sifatida do‘konlarni surishtirdi. Uni uzoq qidirishga hojat qolmadi. Sababi birinchi kirgan do‘kondayoq sotuvchi 4,5 ming dollarga sotib olish mumkinligini aytgan. Sotuvchilar “xaridor”dan ko‘p bor haqiqatan ham sotib oladimi yoki yo‘qligini so‘ragan. Agar rostan sotib oladigan bo‘lsa, ombordan olib kelinishi aytilgan, chunki vetrinada iPhone 15 yo‘q edi. 

Quyidagi videoda ham ko‘rishingiz mumkin: muxbir ertaga sotuvga chiqarilishi aytilgan telefon qanday qilib bugundan sotila boshlaganini bilishga uringan. Sotuvchilar telefonlardan biri bugun Dubay va yana biri esa ertaga AQSH orqali kelishi kerakligini aytgan. Sotuvchilar muxbir bilan suhbatda boshqa bir do‘konda telefon 4500 dollarga sotilganini aytib, internetda tarqalgan ma’lumotni tasdiqlagan.