Birlashgan Millatlar Tashkilotining Afg‘onistondagi gumanitar yordamni muvofiqlashtirish boshqarmasi (OCHA) maʼlum qilishicha, mamlakat onalar va bolalar o‘limi bo‘yicha dunyoda birinchi o‘rinda turadi.
Tashkilot Afg‘onistonda har 100 ming chaqaloqdan 699 nafari vafot etishini ma’lum qildi va bu dunyo bo‘ylab eng ko‘p go‘daklar o‘limi ekanini qayd etdi.
OCHA bayonotida aytilishicha, “Tolibon” Afg‘oniston ustidan nazoratni qayta tiklaganidan keyin ushbu raqam ortgan.
Avvalroq Jahon oziq-ovqat tashkiloti mablag‘ yetishmasligi tufayli Afg‘onistonga yordamini qisqartirayotgani xabar qilingandi. Moliyaviy muammolar sabab Jahon oziq-ovqat dasturi har besh nafar ehtiyojmand afg‘ondan faqat bittasiga yordam ko‘rsata olishini ma’lum qildi.
Ekspertlarning ta’kidlashicha, ochlik afg‘on aholisini pul va oziq-ovqat topishning muqobil yo‘llarini izlashga majbur qiladi, bulardan eng tez va osoni — jinoyat, ya’ni giyohvand moddalar savdosi, talonchilik va terrorizmdir. Ushbu ssenariy ekstremistik kayfiyatning kuchayishi uchun qulay zamin yaratadi, bu esa keyinchalik Afg‘onistonga qo‘shni davlatlar, Xitoydan tortib Markaziy Osiyogacha bo‘lgan mamlakatlarda vaziyatning keskinlashuviga olib keladi.
Izoh (0)