Jahon sog‘liqni saqlash tashkiloti rahbari Tedros Adanom Gebreyesus Xitoy rasmiylaridan koronavirusning kelib chiqishi haqida qo‘shimcha maʼlumot berishni talab qildi. Bu haqda Financial Times xabar berdi.

Gebreyesus kovid kelib chiqishini tekshirish uchun ikkinchi delegatsiyani Xitoyga yuborishga tayyorligini bildirdi. Chunki Xitoyning Uxan shahrida birinchi infeksiya holatlaridan to‘rt yil o‘tib ham virusning kelib chiqishi noma’lumligicha qolmoqda.

“Xitoydan bu ma’lumotlarga to‘liq kirishni ta’minlashni va boshqa mamlakatlardan ikki tomonlama uchrashuvlar chog‘ida bu masalani ko‘tarishni so‘raymiz”, — dedi  Gebreyesus.

JSST rahbarining bayonoti koronavirus holatlari ko‘payganidan keyin vaksinalarni yangilash bo‘yicha muhokamalar chog‘ida e’lon qilindi. Garchi dunyo endi pandemiya xavfi ostida bo‘lmasa-da, olimlarning ta’kidlashicha, mamlakatlar virusning boshqa mutatsiyaga uchragan variantlari ustidan nazoratni kuchaytirishi kerak.

Hozirda COVID-19 ning kelib chiqishi haqidagi ikkita mashhur nazariya ko‘rib chiqilmoqda: virusning Uxandagi dengiz mahsulotlari bozoridagi hayvonlardan odamga yuqishi yoki mahalliy laboratoriyadan sizib chiqishi.

“Tez orada javob olamiz. Bu vaqt masalasi”, — deya qo‘shimcha qildi Gebreyesus.

COVID-19 epidemiyasi birinchi marta 2019-yil dekabr oyida Xitoyning Uxan shahrida qayd etilgan. 2020-yil 30-yanvarda JSST ushbu epidemiyani xalqaro ahamiyatga molik favqulodda holat, 2020-yil 11-martda esa pandemiya deb eʼlon qilindi.