Qirg‘izistonda 16-sentabr kuni Tabiiy resurslar vazirligi tomonidan Milliy tozalik kuni munosabati bilan keng ko‘lamli ekologik tadbir o‘tkazilmoqda. Bu haqda tashkilot matbuot xizmatiga tayanib, “Daryo” muxbiri xabar berdi.

Qirg‘iziston prezidenti Sadir Japarovning 2022-yil 6-sentabrdagi qarori ijrosi doirasida butun mamlakat bo‘ylab rasman umumxalq tozalik kuni e’lon qilingan.

Vazirlik barcha fuqarolarni atrof-muhitni toza saqlash va yaxshilash uchun kuchlarni birlashtirib, ushbu tashabbusga qo‘shilishga chaqirdi.

Bunday aksiya birinchi marta 2022-yil 8-oktabrda bo‘lib o‘tgan. Ekologik tadbirga 133 ming 508 nafar fuqaro jalb qilinib, 600 tonnadan ortiq chiqindi yig‘ilgan va utilizatsiya qilingan.

Barcha chiqindilar ehtiyotkorlik bilan saralanadi hamda qayta ishlash korxonalariga olib ketiladi. Bu yilgi aksiya ham shu prinsip bo‘yicha amalga oshirilmoqda.

Tadbirdan ko‘zlangan asosiy maqsad chiqindilarni alohida yig‘ish amaliyotini jamiyatga joriy etish, fuqarolarning ekologik madaniyatini oshirishdan iborat, deydi vazirlik